The cover up loyihasida tanilgan, “Yaxshi ko‘rardim”, “Janona”, “Yor” qo‘shiqlari bilan tinglovchilar qalbidan joy olib kelayotgan yosh ijodkor G‘aybulla Tursunov “Xalqlar do‘stligi” san’at saroyida ikki kunlik ilk yakkaxon konsert dasturini muxlislari e’tiboriga havola qilyapti.
Xonandaning ilk konserti bo‘lishiga qaramasdan u to‘rt mingdan ziyod tomoshabin qarshisida to‘liq jonli ijroda kuyladi. Sahna orti va dasturning eng qaynoq lavhalarini “Daryo” o‘z kamerasiga muhrladi.
San’atkorning do‘stlari, ijoddagi hamkorlari, qo‘shiqchilar va oila a’zolari konsert oldidan unga iliq tilaklar bildirdi. Konsert ikki blokdan iborat bo‘lib, jami 19 ta qo‘shiq kuylandi. “Yilning eng yaxshi ayol xonandasi” nominatsiyasini olgan ijodkor Jasmin bilan “Dil” taronasi kuylandi. Jasmin sahnada G‘aybulla Tursunovning ilk konserti bilan tabriklab, o‘zi ham kelasi yilda konsert bermoqchiligini aytdi.
G‘aybulla aka bilan ko‘p tadbir va konsertlarda birga kuylaganmiz, ikkimizga ham jonli kuylash qiyin emas, qaytanga bizga jonli ijro yoqadi, deydi Jasmin. Yangi duet kuylamoqchi edik, ammo konsert tayyorgarligi bilan ulgurmadik. Shuning uchun o‘zimning repertuarimdan “Kumush nolasi” qo‘shig‘imni kuylab beraman.
Avvallari sho‘x-shodon qo‘shiqlar kuylagan, so‘nggi paytlarda jiddiy mavzulardagi qo‘shiqlari ko‘payganining sababi so‘ralganda xonanda shunday javob berdi:
Ijodkor bir xil yo‘nalishda to‘xtab qolmasligi kerak, deb hisoblayman. Jiddiy mavzularda ham, kimlargadir “tegadigan” mavzularda ham va albatta, xalqbop qo‘shiqlar ham kuylayman. Faqat bitta mavzuda qo‘shiq aytish kerak emas, menimcha.
Konsertga yaqinda kelin bo‘lgan Afruza turmush o‘rtog‘i bilan, Mushtariy Zafar, bloger va qo‘shiqchi Azoda, Dilshod Nazarov kelib xonandani debyut konserti bilan tabrikladi.
Dastur barcha sevgan “Yaxshi ko‘rardim” qo‘shig‘i bilan boshlandi. Eng “bomba” bo‘lgan chiqish Jahongir Otajonov bilan kuylangan duet premyerasi bo‘ldi. Yosh san’atkorning ustozi o‘z repertuaridan eng raqsbop qo‘shiqlarini kuylab, zalni “oyoqqa turg‘azdi”.
G‘aybulla Tursunov konsert so‘ngida barcha kutgan “Janona”ni muxlislari bilan birgalikda kuyladi, ular bilan suratga tushib, o‘zi ham “yondi”, zalni ham “yondirdi”. Hattoki, dastur tugab, pardalar tushirilgandan so‘ng ham qo‘lidan mikrofonini qo‘ymay, “Janona”sini kuylab turdi.
Emotsiyalar ichidagi, konsert berganiga o‘zi ham ishonmagan xonanda o‘z taassurotlari haqida jurnalistlarga to‘lib-toshib gapirib berdi.
Xalq xizmatlari, tadbirlarda doim jonli kuylayman, shu sababli konsertim ham to‘liq jonli bo‘lishini xohladim. Minglab insonlar oldida jonli aytish sal qiyinroq bo‘larkan-u, ammo doim jonli ijro tarafdoriman. Birinchi kunda barcha past-balandni ko‘rib oldim, qo‘shiq so‘zlarida biroz adashib ham ketdim, texnik va hayajonlanganda bo‘ladigan xatolarni ertaga qilmayman, deb umid qilaman.
Men ijrochiman, so‘zga usta emasman. Shu sababli ham tomoshabinlar muloqot biroz kamroq bo‘lib qoldi. Jonli ijrodagi konsertda xohlasangiz ham, xohlamasangiz ham baribir improvizatsiya, dasturdan chetga chiqish holatlari bo‘larkan. Ssenariy qolib, sahnada boshqa kutilmagan holatlar bo‘lib ketdi. Tomoshabinlar orasidan bir qiz chiqib raqsga tushib berishi kerak edi, lekin umuman boshqa qiz chiqib oldi, shokka tushib qoldim (kulib).
Konsert boshlanishidan besh daqiqa oldin qattiq tayyorgarliklar ta’siri va kuchli hayajondan ovozim yo‘qolib qo‘ldi. Shifokorlar chaqirib, tinchlantiruvchi ukollar olib sahnaga chiqdim.
Jahongir Otajonov, ustozim bilan duet taklifi u kishidan chiqdi. Vatan haqida qo‘shig‘ing yo‘q ekan, menda bor, beraman dedilar va shu bilan duet kuyladik. Bundan keyin ham ijodiy hamkorliklar to‘xtamaydi.
Aslida o‘nta hit tarona chiqarganimdan so‘nggina konsert beraman, deb niyat qilgandim. Lekin jamoam bilan gapdan gap chiqib hazillashib konsert bermaymizmi, degan gapimni ushlab olishdi shu bilan qolgani tezlashib ketti. Bir kun avval ham konsertim bo‘lishiga ishonmagandim, hozir siz bilan gaplashib turib endi his qilyapman. Hattoki, zal to‘lishiga ishonmagandim, o‘zimning yaqinlarim, tanishlarim bilan 200 tacha odam bilan konsert o‘tkazsam kerak, deyotgandim.
“Nargiz”, “Ko‘cha” qo‘shiqlarimni avval qatnashgan loyihalarimda kuylaganimdayoq muxlislarga yoqqandi. Premyera qo‘shiqlarim ham qalblardan joy olib, hit darajasiga ko‘tariladi, deb umid qilaman. Nasib qilsa, kelasi yil uch kun konsert bermoqchiman” deydi yosh xonanda.
Konsert reportajini to‘liq holatda Daryo Lifestyle YouTube kanalida tomosha qilishingiz mumkin.
Izoh (0)