Aktrisa Shahnoza Hojimurodova YouTubeʼdagi “Daryo lifestyle” kanaliga bergan intervyusida onasining og‘ir hastalikka chalingani, teatr jamoasi qo‘llab-quvvatlagani va ijtimoiy tarmoqlardagi bir chiqishi uchun qattiq tanqid qilishgani haqida gapirdi.
— Uch-to‘rt yil oldin onam og‘ir bemor bo‘lib qoldi. Buni eslash farzand uchun juda og‘ir, ammo onamning ahvoli shu qadar og‘ir ediki, u o‘lim to‘shagida edi. Men ish nima bo‘lsa bo‘lsin, onamga qarayman deb Xorazmga ketdim. Onam o‘zini bilmaydigan holatda edi. Xorazmga yetib borgan kunimoq teatrdan qo‘ng‘iroq bo‘ldi. “Onam kasal, uni tashlab ketolmayman, rollarimni dublyorim ijro etib tursin, qachon qaytishimni bilmayman”, dedim. Oradan bir necha daqiqa o‘tib, rahbarimiz, O‘zbekiston xalq artisti Yodgor Saʼdiyev qo‘ng‘iroq qildi.
Aslida, men u paytda teatr va uning jamoasi uchun hech kim emasdim. Chunki hali shtatga olinmagan, gonorar asosida ishlaydigan aktrisa edim, xolos. Rahbarning “Qizim, nima bo‘ldi? Bizdan qanday yordam kerak?” degan gapi ko‘nglimni tog‘dek ko‘tardi. “Siz bugunoq Toshkentga qaytib, rolingizni ijro eting, onangizning sog‘lig‘ini bizga qo‘yib bering”, dedi. Shu kuni kechki reys bilan poytaxtga qaytdim. Ertasi kuni esa tibbiyot birlashmasi tomonidan onamga kasalxonaga yotishi uchun order berishmayotgandi. To‘g‘rirog‘i, ikki haftadan keyin beramiz, deb vaqtni ortga surishayotgandi. Ammo onam buncha vaqt kutolmasdi, chunki ikkila buyragi ham ishdan chiqib bo‘layotgandi. Order ajratilgach, onamni aeroportda kutib olib, tezlik bilan kasalxonaga yotqizishdi. Onam ikki kunda ko‘zlarini ochib, o‘ziga keldi. Onamning vazni qisqa fursatda 70 kilodan 45 kiloga tushib qolgan, o‘zini bilmaydigan ahvolda edi. Onam haligacha Yodgor akani duo qiladi, shu inson sabab onamning salomatligi yaxshilandi. U hayotga qaytdi. Shu bois teatrni ikkinchi oilam deyman, qiyin vaziyatlarimda ko‘p qo‘llab-quvvatlashdi, deydi Shahnoza Hojimurodova.
Aktrisa baʼzi vaynlari uchun teatr jamoasidan qattiq tanbeh eshitgani haqida gapirdi.
— Bir kuni hamkasbim Saida Saidbekova faqat ayollar jamoasidan iborat “Zumrad va Qimmat” nomli vaynlar to‘plamini suratga olishni taklif qildi. U Qimmat, men esa Zumrad rolini ijro etardim. Uch-to‘rtta vaynlar tarmoqlarga joylanganidan keyin ustozimiz Shohida Ismoilova qo‘ng‘iroq qilib, “Qizim, hozir Zulfiyaxonim filmidagi rolingizni ko‘rib o‘tiribman. Qanday chiroyli ijro, sizdek aktrisaga bunday rollar yarashmaydi”, deb avval ko‘kka olib chiqib, keyin pastga tushirdilar. Bunday qo‘shtirnoq ichidagi eʼtiroflarni juda ko‘p ustozlardan eshitdim. “Siz akademik drama teatri aktrisasisiz”, degan gapdan keyin zudlik bilan vaynlarda suratga tushishni to‘xtatishga qaror qildim. Buni Saida Saidbekova ham to‘g‘ri tushundi. Undan keyin tarbiyaviy ahamiyatga ega vaynlarda suratga tushdim. Bu zamon talabi, shu bilan birga, tarbiyaviy ahamiyatga ega. Menimcha, rollarim bachkana emas, chunki vaynlarning birortasida boshda ro‘molsiz chiqmayman, deydi aktrisa.
Aktrisa bilan bo‘lgan suhbatni to‘liq holda tomosha qiling.
Izoh (0)