Bugungi kunda ijod olamidagi janrlar va qarashlar bir muncha o‘zgardi. Ijtimoiy tarmoqlar rivojlangach, qisqa videolarni suratga olish anchayin urfga aylandi. Instagram’da salkam yarim million obunachiga ega vayner YouTube’dagi “Daryo lifestyle” kanaliga bergan intervyusida kuzatuvchilarni qiziqtiradigan ko‘plab savollarga javob berdi.
“Sanʼatkor bo‘lishimga qarshi bo‘lishgan”
— Dadam somsapaz, onam esa uy bekasi. Buni aytishdan hech qachon uyalmaganman. Chunki ular halol mehnat qilib, qiyinchiliklar bilan bizni voyaga yetkazishdi. Oilada to‘ng‘ich farzand bo‘lganim uchun uka, singlimga qaraganda ota-onamning qiyin kunlariga ko‘proq guvoh bo‘lganman. Bolalikdan sanʼatga qiziqishim yuqori bo‘lgan, vokal darslariga qatnaganman. Ammo aktrisa bo‘lish niyatim qatʼiylashganida ko‘pchilik qarindoshlarimiz qarshi bo‘lishgan. O‘sha vaqtda ko‘proq meni onam qo‘llab-quvvatlagan. Estrada sirk kollejiga o‘qishga kirib, sirk artisti yo‘nalishida tahsil oldim. Ammo kollejni tamomlab, institutga kirish niyatim bo‘lmadi. Buning o‘ziga xos sabablari bor.
“Erta ishlashga majbur bo‘lganman”
-YmCYewhn.jpg)
— Oddiy, kamtarin oilada voyaga yetganman. 15-16 yosh bo‘lganimda ko‘p moliyaviy qiyinchiliklarga uchraganmiz. Chunki ketma-ket ulg‘aygan uchta bolani boqish va o‘qitish yolg‘iz ro‘zg‘or tebratadigan dadamga og‘ir edi. Shu bois biroz yordamlashganman. Ammo begona joyda, notanish insonlar bilan ishlamasdim. Atrofimdagi insonlarning hammasi tanish bo‘lgani uchun ota-onam ishlashimga qarshi bo‘lishmagan. Qahvaxonada ofitsiantlik qilganman, keyin savdo sohasida ishlaganman, undan keyin ayollar stilistiga shogirdlikka tushganman.
Do‘konlarga shirinlik tarqatadigan firmaga savdo agenti bo‘lib ishga kirganman. Do‘konlar bilan gaplashib, mahsulotimizni xarid qilishga ko‘ndirishimiz kerak edi. Har kuni bir necha chaqirim piyoda yurardim va yo‘limda uchragan do‘konga kirib “Mahsulotimizni oling”, deb iltimos qilardim. Hech esimdan chiqmaydi, yo‘lda ketayotganimda etigim yirtilib ketgan. Eng alam qilgani — bola bo‘lganim uchun hech narsani tushunmaganman. Ular sotilmay qolgan mahsulotlarning pulini oyligimizdan bosib qolishgan.
“Kastinglardan ko‘nglim qolgan”
— Aslida, xonanda bo‘lish niyatim bo‘lmagan, ammo bir muddat to‘ylarda qo‘shiq aytganman. Bek vokal xonandasi bo‘lib to‘ylarga chiqardim. Jurnalist yoki aktrisa bo‘lishni orzu qilganman. Juda ko‘p kastinglarda ishtirok etganman, telekanallarga borib, ish so‘raganman. Ammo har doim “O‘zimiz qo‘ng‘iroq qilamiz”, deb qayta aloqaga chiqishmasdi. Bir nechta seriallarga chiqqanman, ammo hech qanday naf bo‘lmagan. Yaʼni o‘zimni aktrisa sifatida ko‘rsatolmaganman. Eng yomoni, menga gonorar tugul, yo‘l pulini ham berishmasdi. Keyin to‘ylarda tajriba orttirib, boshlovchi sifatida ishtirok etishni boshladim. Hozir ham kasting deyishsa, o‘sha voqealar ko‘z oldimdan o‘tadi. Kastinglardan ko‘nglim qolgan.
“Men jamoaga sodiqman”
— “Mitti vayn” jamoasi a’zolari meni Instagram’da kuzatib borishar ekan, o‘zlari aloqaga chiqib taklif etishgan. Bitta vayn Instagram’ga joylangach, juda ko‘p jamoalardan takliflar yog‘ilgan. Ular orasida juda mashhurlari va yaxshi gonorar taklif etganlari ham bo‘ldi. Ammo tabiatan juda sodiq insonman, u jamoadan bunisiga o‘tishni istamayman. Shu bois barchalarini rad etganman.
O‘tgan yili Yangi yil bayrami uchun to‘ydan qochgan kelin mavzusida vayn suratga olganmiz. Bir sutka davomida suratga olingan. Uning baʼzi epizodlari Amirsoy tog‘ zonasida olinishi kerak edi. Tabiatan sovuqni yoqtirmayman, tezda tobim qochib qoladi. Qahraton qish kuni bir sutka davomida ishlashimizga to‘g‘ri kelgan. Eng yomoni, mashinalar muzda yurolmay, o‘chib qolgan.
“Instagram’ni yo‘qotish men uchun fojea”
— Bilaman, Instagram ham qachondir eskirishi, avvalgidek aktual bo‘lmay qolishi mumkin. Ammo uni yo‘qotish men uchun fojea. Chunki obunachilarim oilamning bir bo‘lagiga aylanib qolishgan. Ulardan hech narsani yashirmayman, maslahatlashaman, kerak paytim dardimni aytib yengillashaman. Ishonasizmi, yaqinda bo‘yin sohamdan kichik jarrohlik amaliyotini boshdan kechirdim. Ular xuddi yaqiniga qayg‘urgandek mendan xavotir olishdi.
Izoh (0)