Koreya Respublikasi Qurolli kuchlari Shimoliy Koreya chegarasida ogohlantiruvchi o‘t ochdi. Pxenyan bu hodisani provokatsiya deb baholamoqda. Bu haqda Koreya xalq armiyasi (KXA) Bosh shtabi boshlig‘i o‘rinbosari Ko Chon Chxol ma’lum qildi.
“19-avgust kuni Koreya Respublikasi armiyasining harbiy mutaassiblari jiddiy provokatsiya sodir etdi. Janubiy chegara chizig‘i yaqinida doimiy to‘siqlar qurayotgan harbiy xizmatchilarimizning harakatlariga javoban 12,7 millimetrli yirik kalibrli pulemyotdan 10 dan ortiq ogohlantiruvchi o‘q uzishdi”, dedi general-leytenant.
U bu voqea Ulchi Freedom Shield Amerika—Janubiy Koreya harbiy mashqlari fonida sodir bo‘lganini ta’kidlagan.
“Bunday harakatlar juda tashvishli alomat bo‘lib, ulkan qurolli kuchlar bir-biriga qarama-qarshi turgan janubiy chegara hududidagi vaziyatni nazorat qilib bo‘lmaydigan holatga olib kelishi mumkin. Bizning armiyamiz hozirgi vaziyatni diqqat bilan kuzatib bormoqda”, degan Ko Chon Chxol.
Uning tushuntirishicha, KXDR “janubiy chegarani to‘sib qo‘yish” va hududiy chegaralanish uchun to‘siqlar qurmoqda. Bu oxir-oqibat “keskinlikning asosiy omilini bartaraf etadi va hech kimga tahdid solmaydi”.
General Pxenyan Koreya Respublikasi Qurolli kuchlari ustidan nazoratni saqlab qolgan Amerika tomonini kamida ikki marta – 25-iyun va 18-iyul kunlari qurilish ishlari olib borilayotgani haqida xabardor qilganini eslatgan.
Bundan avval Shimoliy Koreya yetakchisi Kim Chen In mamlakatning yadroviy qurollarini tezkor ravishda kengaytirishi kerakligi borasida topshiriq bergani xabar qilingandi.
Izoh (0)