Jasmin, G‘aybulla Tursunov, Dilnoza Kubayeva: “Yangi O‘zbekiston yulduzlari” milliy mukofotida kimlar taqdirlandi?

31-yanvar kuni muhtasham “Renessans hall” tadbirlar zalida “Yangi O‘zbekiston yulduzlari” milliy mukofoti taqdirlash marosimi bo‘lib o‘tdi. O‘zbekiston madaniyat va san’at sohasida ulkan yutuqlarga erishgan ijodkorlar orasidan eng iqtidorlilari mukofotga loyiq deb topildi.

Kechada O‘zbekiston Madaniyat vazirligi matbuot kotibi, suxandon Sirojiddin O‘sarov hamda Laziza Nozimxonova boshlovchilik vazifasini o‘tadi.

Bu yilgi taqdirlash marosimi avvalgilaridan farqli ravishda yangi ruh va formatda o‘tkazildi. Mukofot sohiblari madaniyat va san’atning turli yo‘nalishlarida ijod qilayotgan nomzodlar orasidan saralandi. 20 nafar ijodkor ushbu yuksak mukofot bilan taqdirlandi.

Mukofot g‘oliblari maxsus statuetka, sertifikat va bazaviy hisoblash miqdorining 100 baravari miqdorida pul mukofoti bilan taqdirlandi.

Mukofot turli yo‘nalishlar bo‘yicha berildi.

Kino, teatr va ommaviy tomoshalar yo‘nalishi:

Yilning eng yaxshi spektakli – “Cho‘lpon” spektakli;

Yilning eng yaxshi badiiy filmi – Bahodir Yalangto‘sh;

Yilning eng yaxshi qo‘g‘irchoq spektakli – Qashqadaryo viloyati “Alp o‘g‘lon” spektakli;

Yilning eng yaxshi teatr aktyori – Hamza Hasanov;

Yilning eng yaxshi teatr aktrisasi – Sevara Shodiyeva;

Yilning eng yaxshi teatr rejissyori – Obidjon Abdullayev;

Yilning eng yaxshi qiziqchisi – Jamshid Normatov;

Yilning eng yaxshi sirk artisti – Darina Matveyeva.

Estrada, an’anaviy, opera xonandaligi, musiqa ijrochiligi va raqs san’ati yo‘nalishi:

Yilning eng yaxshi an’anaviy erkak xonandasi – Bobur Kenjayev;

Yilning eng yaxshi an’anaviy ayol xonandasi – Adolat Ismoilova;

Yilning eng yaxshi opera ijrochisi – Otabek Nazirov;

Yilning eng yaxshi estrada erkak xonandasi – G‘aybulla Tursunov;

Yilning eng yaxshi estrada ayol xonandasi – Jasmin (Madina Fayzullayeva);

Yilning eng yaxshi orkestri – O‘zbekiston davlat simfonik orkestri;

Yilning eng yaxshi raqqosasi – Dilnoza Mirzayeva;

Yilning eng yaxshi sozandasi – Saidakbar Tursunxo‘jayev;

Aholiga xizmat qilgan yilning eng yaxshi kutubxonasi – Sa’dulla Qurbonboyev;

Yilning eng yaxshi adibi (shoiri) – Qutlibeka Rahimboyeva;

Yilning eng yaxshi milliy madaniyat markazi – Respublika Turkman milliy madaniy markazi;

Yilning eng yaxshi media loyihasi – “Ovoz”.

— Bu mashhurlik mukofoti emas, bu xalqqa sidqidildan xizmat qilayotganlarning mukofoti! Ular beminnat, shu bilan birga mehnati evaziga hech nima kutmay ijod qilayotgan ijodkorlardir. Ularning faoliyati hujjatlarda turibdi, qayd etilyapti. Madaniyat vazirligining barcha tadbirlarida faol bo‘lib, respublikaning eng chekka hududlariga ham borib askardek xizmat qilib kelishyapti. Balki, ularni xalq tanimasligi mumkin, ammo xalqqa beminnat xizmat qilayotganlarni e’tirof etmasak, kimni e’tirof etishimiz kerak? Bemalol o‘zi konsert berib, bemalol o‘zi vaynlar olib, reklama, to‘ylardan yaxshi daromad olib yurganlarni Madaniyat vazirligi bu nuqtayi nazardan baholashi to‘g‘ri bo‘lmaydi. Vazirlik ko‘zga ko‘rinmagan, mehnati katta bo‘lsa-da parda ortida qolib ketayotgan fidoyilarni taqdirlashni maqsad qilgan, deydi madaniyat vaziri Ozodbek Nazarbekov jurnalistlarga bergan intervyusida.

Videoni to‘liq holda Daryo Lifestyle YouTube kanalida tomosha qiling.