15-yanvar kuni Toshkentdagi muhtasham “Xalqlar do‘stligi” san’at saroyida qoraqalpoq elining farzandi, “Do‘stim, do‘stim”, “Lyubimaya” qo‘shiqlari bilan tanilgan iste’dodli xonanda Osman Navruzovning ikkinchi yakkaxon konsert dasturi bo‘lib o‘tdi. Yorqin lahzalarga boy bo‘lgan kechada xonanda o‘zining eng sara va xit qo‘shiqlari bilan barcha muxlislarini “oyoqqa turg‘azdi”. “Daryo” muxbiri konsertga borib, xonandaning o‘zi, yaqinlari bilan suhbatlashdi hamda kechadan maxsus reportaj tayyorladi.
Yosh xonandani qo‘llab-quvvatlash uchun Vohidjon Isoqov, xorazmlik qo‘shiqchilar Sevinch Ismoilova va Gulinur hamda ozarbayjonlik yulduz Nefes o‘z yurtidan tashrif buyurdi. Ular bilan kuylangan duetlar guldastasi esa konsertning yana fayzli o‘tishiga sabab bo‘ldi. Sevinch Ismoilova hamkasbini ikkinchi konserti bilan tabriklab, kecha fayzli o‘tishini tiladi.
Konsertda aktrisa Shahlo Temirova boshlovchilik mas’uliyatini o‘z zimmasiga oldi. Qiziqchi Elmurod Haqnazarov esa doimgidek o‘z vazifasida — har bir blok so‘ngida, ya’ni xonanda tanaffusga kirganda u tomoshabinlarni zeriktirmadi.
“O‘zbekkonsert” tomonidan Osman Navruzovga “Mazmunli va yorqin qo‘shiqlari uchun” mukofot taqdim etildi. Aslida taqdirlash marosimi 2024-yilning 24-dekabrida bo‘lib o‘tgan bo‘lsa-da, xonanda bu vaqtda Turkmanistonda gastrol safarida edi. Shu bois o‘z mukofotini olish unga o‘z konsertida nasib etdi. Bu esa, avvalo, Osmanning ota-onasi, qolaversa, chin muxlislari va o‘zi uchun ham ikki karra xursandchilik olib keldi.
— Barcha san’atkorlar, ustozlar orzu qiladigan san’at saroyida konsert berish menga ham nasib etyapti, bundan behad xursandman. Bu safargi konsert o‘zgacha bo‘ladi, sababi kutilgan va kutilmagan duetlar bilan muxlislarimni xursand qilaman. Konsert fonogramma bo‘lishiga qaramay, orada jonli ijroda ham qo‘shiqlar bo‘ladi, deydi Osman Navruzov konsert boshlanishidan avval “Daryo” jurnalistiga bergan intervyusida.
— “Do‘stim-do‘stim” qo‘shig‘i mening “To‘ylar muborak”im (tah. — “tashrif qog‘ozi”) bo‘lib qolgan. Uni konsertning boshida kuylasam dastur tugab qoladi, uniyam, albatta, ijro etaman, faqat eng oxirida, deydi xonanda.
Ozarbayjonlik go‘zal xonanda Nefes bilan kuylangan “Osiyoda, Yevropada bir donasan, bir dona, ay, jonim, Nefes xonim oldi mening aqlima” qo‘shig‘i konsertning kulminatsion nuqtasi bo‘ldi. Muxlislar xorijlik xonanda bilar baravariga kuylab, uni to‘xtovsiz olqishlar bilan qo‘llab-quvvatladi.
Osmanning yaqin do‘sti Vohidjon Isoqov shunday dedi:
— Bugun mehmon sifatida tashrif buyurdim, tomoshabinlar qatorida bo‘laman. Osmanning ijodiga omad tilayman, mening konsertlarimda ham Xorazmdan uchib yetib kelgan paytlari bo‘lgan, unga hurmatim baland. Bir-birimizni qo‘llab quvvatlaymiz, yosh san’atkorlarning ichida o‘z o‘rniga ega, dedi u.
Xonanda o‘zining ijodida qanday yangiliklar borligi haqida ham so‘zlab o‘tdi:
— Bu yil o‘zgarishlar katta bo‘ladi, katta shijoat bilan konsertga tayyorgarlik ko‘ryapman, yanvar oyida Sevinch Mo‘minova bilan yangi duet chiqadi. Nega yana u bilan kuylayotganimning sababi bizning ovoz tempimiz bir-birimizga mos tushadi. Mening ham, Sevinchning oilasidagilar ham sizning ovozingiz juda mos, faqat birga kuylanglar deyishadi (kulib), dedi Vohidjon Isoqov.
Konsert Osman Navruzovning to‘yi bo‘ldi desak ham mubolag‘a bo‘lmaydi, buni xonandaning o‘zi ham tasdiqladi. “Ona, o‘ynang, raqsga tushing. Bugun mening to‘yim” deya volidasini sahnaga taklif qilib, “Bugun to‘yim, o‘ynang, ona” nomli qo‘shig‘ini ijro etdi. Konsertdagi deyarli barcha qo‘shiqlar raqsbop bo‘ldi, zal voha va qoraqalpoq elining odamlari bilan to‘ldi.
Konsertdan reportajni to‘liq holda Daryo Lifestyle YouTube kanalida tomosha qilishingiz mumkin.
Izoh (0)