Sport bilan shug‘ullanmasa ham, doimo jozibali ko‘rinadigan yulduzlar

Ushnu mashhur ayollar noziklik va jozibadorlikka faqat sportzalda mashaqqatli mehnat orqali erishish mumkin, degan stereotipni yo‘q qiladi. Tabiatan nozik bo‘lishga muyassar bo‘lgan go‘zallar ham bor. Ular o‘zlarini muntazam va charchatadigan jismoniy mashqlar bilan bir shaklda ushlab turishlari shart emas.

Emili Ratakovski

Emili Ratakovskining qomati — ko‘plab qizlarning orzusi. Agar model bunday tanaga jismoniy mashqlarsiz erishganini hisobga olsak, bu haqiqatdan ham g‘ayrioddiy narsa deb hisoblash mumkin. Yulduz tug‘uruqdan keyin imkon qadar tezroq tiklanish uchun o‘z qomatini diqqat bilan kuzatib bordi. Ammo umuman olganda, u sport zalini yoqtirmaydi va o‘zining nozik hamkasblari singari u yerga tashrif buyurmaydi. Ratakovskining bunday tarang va jozibali bo‘lib qolishiga yoga va to‘g‘ri ovqatlanish yordam beradi, bundan tashqari u o‘zini baʼzan kaloriyaga boy shirinliklar bilan ham siylaydi.

“Trenerim yo‘q, sportzalga bormayman. Biz do‘stlarimiz bilan sayr qilamiz, piyoda sayohatlarga chiqamiz. Fitnesga qiziqmayman, sohamda meni oq qarg‘a deb atash mumkin. O‘ylaymanki, vaqti-vaqti bilan o‘zingizni ortiqcha narsalar bilan siylash mumkin. Men chipslar uchun aqldan ozmayman, lekin ertalab keks yoki kruassan bilan o‘zimni siylashni yaxshi ko‘raman”, deb bo‘lishdi model intervyuda.

Rianna

Baʼzida Riannada gantel ko‘tarish va fitnes bilan shug‘ullanish istagi paydo bo‘ladi. Xonanda bu tanaga juda foydali ekanini tushunadi va oldingi intervyularida u muntazam ravishda mashq qilishni xohlayotganini bir necha bor aytgan. Ammo bu motivatsiya tezda yo‘qoladi — yulduz sport bilan shug‘ullanishda intizomni hali ham shakllantira olmadi. Boshqa intervyularida Riri jismoniy mashqlar va sport zaliga borish uning uchun emasligini aytdi. Bu juda zerikarli va holdan toydiradi. Hatto xonanda bir necha kilogramm ortiqcha vazn olgan bo‘lsa ham, u o‘zini qulay va ishonchli his qiladi. Va bu ayol o‘ziga bo‘lgan hurmat uchun eng muhim narsa!

“Men sport zaliga borishni yoqtirmayman, bu eski urf. Men juda oddiy, odatiy va yaxshi maʼlum bo‘lgan hamma narsadan nafratlanaman, bundan juda tez zerikaman”, deb taʼkidladi Riri.

Emma Stoun

Emma Stoun esa sportni, diyetani va boshqa har qanday cheklovlarni umuman yoqtirmaydi. Aktrisaga jismoniy mashqlar bilan shug‘ullanish yoki o‘zini biror narsada cheklash kerak bo‘lganda, bu uni g‘azablantiradi. Lekin shunga qaramay, u qanchalik nozik va jozibali! Emma o‘zining ideal parametrlarini organizmdagi tez modda almashinuvi va tabiiy ravishda o‘ziga berilgan qomat tuzilishi bilan izohlaydi. Ammo qiziq, agar Stoun noziklikka moyil bo‘lmasa, sportga qanday munosabatda bo‘lardi?

“Men tosh ko‘targanimda g‘azablanishimni payqadim. Umuman olganda, bu men qilishni istagan narsa emas”, deb tushuntirdi yulduz.

Priyanka Chopra

Aktrisa ijtimoiy tarmoqlarda faol ravishda blog yuritadi va har bir qadamini qayd etadi. Nima uchun u hozirgacha sport zalidan bitta ham fotosurat joylamagan? Aslida Priyanka Chopra u yerga umuman bormaydi. Albatta, u kadrda ajoyib ko‘rinish uchun ideal shaklda bo‘lishni xohlaydi. Ammo bunda unga sportdan ko‘ra genlari ko‘proq yordam beradi. Aktrisa tabiatan ajoyib tanaga ega bo‘lish baxtiga muyassar. Agar Priyanka baʼzan tanasi uchun foydali mashqlar qilsa ham, u “yumshoq” va kam yuklamali — masalan, yoga bilan shug‘ullanadi.

Intervyuda Chopra “Malibu qutqaruvchilari” filmini suratga olish jarayonida undan boshqa butun aktyorlar tarkibi, cho‘milish kiyimlarida ajoyib ko‘rinish uchun sport zalida deyarli yashab qolib shug‘ullanishganini esladi.

“Aslida, men sport zallarining muxlisi emasman. Men genetik jihatdan hind genlarim tufayli ortiqcha vaznga moyil emasman. Mashq qilishim shart emas, lekin Kelly Rohrbach meni u bilan mashq qilishim kerakligiga ishontirishga harakat qiladi. Har kuni ertalab u meni zalga borishga majbur qilganda, men shunchaki: o-o-o, men yana yarim soat uxlashim mumkinmi, deb javob beraman. Ular tinmay mashq qiladilar! Men esa gamburgerim bilan biror joyga yashirinishga harakat qilaman”.

Megan Foks

Internetda Megan Foksning turmush tarzi haqida bir-biriga zid maʼlumotlar mavjud. Ilgari xorijiy ommaviy axborot vositalari aktrisa faol ravishda mashq qilishini taʼkidlagan, keyinchalik esa u jismoniy mashqlarni yoqtirmasligi va sport zaliga bormasligi haqida yozishni boshladi. Kimga ishonish kerak? O‘zingizning sezgingizga! Yulduz ijtimoiy tarmoqlarda faol bo‘lganida ham, sport zalidan fotosurat joylagan emas. Bundan tashqari, sport bilan shug‘ullangandan ko‘ra Meganni yana bir plastik jarrohlik amaliyotiga osongina ko‘ndirish mumkin. Baʼzan orzu qilingan tanani jarrohlik amaliyoti bilan yaratish, sport bilan uzoq va tinimsiz shug‘ullanishdan ko‘ra osonroq va tezroq bo‘ladi. Foks jismoniy faoliyatni yoqtirmasligini tasdiqlovchi yana bir sabab — bu uning shu haqda aytgan hazili:

“Men mashq qilmayman. Agar Xudo egilishimni xohlasa, oldimda polga olmoslarni sochgan bo‘lardi”.