Bu yulduzlar shon-shuhratni orzu qilmagan, kastinglarga bormagan va muvaffaqiyatga erishish yo‘lida kurashmagan ham. Baʼzilari “kompaniya uchun” kinosinovlarga kelgan, boshqalari tasodifan kadrga tushib qolgan va darhol shartnoma olgan, qolganlari esa o‘z treklarini tarmoqqa joylashtirgan hamda bir necha kun ichida mashhur bo‘lishgan.
Gollivud sanoati odamlarning qanday qilib qattiq mehnat qilib, yillar davomida o‘z maqsadlariga erishganlari haqidagi hikoyalarga to‘la. Ammo baʼzan hamma narsani tasodif hal qiladi. Bir lahzada ularning hayoti yaxshi tomonga o‘zgarib ketgan. Ushbu to‘plamda strategiya, aloqalar yoki ambitsiyalarsiz mashhur bo‘lgan yulduzlar to‘plandi. Shunchaki, eng to‘g‘ri vaqtda kimdir ularni payqadi.
Sheylin Vudli: tasodifiy probadan Gollivuddagi karyeragacha
Hozir Sheylin o‘smirlar kinosining taniqli aktrisasi, lekin uning kasbga bo‘lgan yo‘li oson va tez kechmagan. Vudli bolaligidan reklama va epizodlarda rol o‘ynagan, lekin buni ko‘proq xobbi deb bilgan. U universitetga o‘qishga kirishni, arxitektura va dizaynni o‘rganishni rejalashtirar edi.
“Amerikalik o‘spirinning yashirin hayoti” serialining tasodifiy probasidan keyin hamma narsa o‘zgardi. Aynan bu rol Sheylinni birinchi mashhurlik to‘lqiniga olib keldi — uni payqashdi, sevishdi va yirik loyihalarga taklif qila boshladilar. Vudli Teen Choice Awards’da beshta nominatsiyaga sazovor bo‘lib hayratlanarli tarzda barchaning diqqat markazida bo‘ldi. Sheylin shuhratni orzu qilmagan, ammo isteʼdod va omad o‘z natijasini berdi va Sheylin deyarli tasodifan yuksakka ko‘tarildi.
Jeyson Steytem: bozor sotuvchisi kinoga qanday kirib qoldi?
Jangari filmlari qahramoni Jeyson Steytem hech qachon Gollivudni orzu qilmagan. Bolaligidan u professional sport bilan shug‘ullangan, lekin bu xobbi unga pul keltirmagan. Aktyor bir intervyusida, yoshligida soxta atir va zargarlik buyumlari sotib, kun kechirishga majbur bo‘lganini esladi.
Hamma narsa Gay Richi uni ko‘rganida o‘zgardi. Rejissyor o‘zining debyut filmi “Kartalar, pul, ikkita qurol”da ayyor firibgar rolini o‘ynaydigan xarizmatik aktyor qidirayotgan edi. Steytemning model bo‘lib ishlaganini va “har qanday narsani sota olish” qobiliyatini bilib, uni kinoprobaga chaqirdi. Vazifa oddiy edi: soxta zargarlik buyumlarini ishonchli tarzda sotish. Jeyson buni shunchalik tabiiy tarzda bajardiki, darhol rolga tasdiqlandi.
Shunday qilib aktyorlik taʼlimisiz, agentliklarsiz va rejasiz uning kino karyerasi boshlandi. U shunchaki kerakli paytda kerakli odamning nazariga tushib qoldi, qolgani esa tarix.
Greysi Abrams: shunchaki demo qo‘shiqlarini internetga joylashtirgan
Amerikalik qo‘shiqchi Greysi Abrams ijodiy muhitda o‘sgan. U “Yulduzlar jangi” va “Uddalab bo‘lmas topshiriq” filmlarini yaratishda ishtirok etgan taniqli rejissyor, prodyuser va ssenariy muallifi Jey Jey Abramsning qizi.
Otasining muvaffaqiyatli karyerasiga qaramay, qizni kino emas, balki musiqa qiziqtirgan — u bolaligidan musiqaga mehr qo‘ygan. Abrams birinchi qo‘shiqlarini 8 yoshida yozishni boshlagan va keyinchalik o‘z ijodini internetga joylashtirgan. Hammasi o‘z xonasida yozilgan oddiy kaverlar va o‘z demo qo‘shiqlari bilan boshlangan. Bunday soddalik va samimiyat tez orada TikTok va boshqa ijtimoiy tarmoqlardagi tengdoshlarining eʼtiborini tortdi. Shuningdek, qiz o‘z musiqasini SoundCloud’ga joylashtirgan va 2018-yilga kelib 10 000 ta obunachiga ega bo‘lgan.
Bir yil o‘tgach, u yorliq bilan shartnoma imzoladi va 2020-yilda birinchi mini-albomini chiqardi. O‘shandan beri u gastrollarda albomlar chiqaryapti hamda butun dunyoda muxlislari bor. Boshqalardan farqli o‘laroq, Greysi shuhratni orzu qilmagan — shunchaki o‘zi yoqtirgan ishni qilgan va bu ish berdi.
Denni Trexo: do‘stini qo‘llab-quvvatlashga borib jangari filmlar yulduziga aylandi
Denni Trexo hech qachon mashhur aktyor bo‘lishini tasavvur qilmagan. Uning yoshligi og‘ir o‘tgan — Trexo jinoyatchilar guruhiga aʼzo bo‘lgan, giyohvand moddalarni isteʼmol qilgan va bir necha marta qamoqqa tushgan. Umuman olganda, aktyor umrining 11 yilini qamoqda o‘tkazgan, lekin shu vaqt ichida u yangi sevimli mashg‘ulotiga ega bo‘ldi — boks bilan shug‘ullanishni boshladi. U hatto, mahbuslar orasida chempion bo‘lgan. Shundan so‘ng u reabilitatsiya kursidan o‘tib yomon odatlaridan voz kechishga muvaffaq bo‘lgan.
Ozodlikka chiqqanidan keyin Trexo boshqa giyohvandlarga yordam berishni boshlagan va aynan shu odati uni kinoga olib kelgan. Bir kuni uni “Qochqin poezd” filmining suratga olish maydonchasiga maslahatchi sifatida taklif qilishgan — Trexo aktyorlardan biriga u o‘zini yo‘qotmasligi va yana giyohvandlikka qaytmasligi uchun yordam berishi kerak edi. Maydondagi ssenariy muallifi buni ko‘rib, uni jinoyatchi rolini o‘ynashga va boshqa aktyorlarga boks o‘rgatishga taklif qilgan. Uning jiddiy tashqi ko‘rinishi, yaxshi qomati va xarizmasi boshqa rejissyorlarni ham qiziqtirgan va tez orada Trexo kinoda faol suratga tushishni boshlagan.
Bugungi kunda Denni Trexo — jangari filmlar yulduzi, u giyohvandlarga yordam berishni davom ettirmoqda, xayriya ishlari bilan shug‘ullanadi va o‘z misolida shaxsiy harakatlar va omad hayotni yaxshi tomonga o‘zgartirishi mumkinligini isbotlamoqda.
Pamela Anderson: kamera obyektiviga tushib qolib ertasiga mashhur bo‘lib uyg‘ondi.
Pamela Anderson butun dunyoda tanilgan, ammo qizig‘i shundaki, u umuman shon-shuhratga intilmagan — hamma narsani omadli tasodif hal qilgan.
1989-yilda Anderson Vankuverdagi futbol o‘yiniga Labattʼs pivo brendining logotipi tushirilgan futbolkada kelgan. O‘yin davomida operator uning tasvirini stadionning katta ekraniga chiqardi. Tomoshabinlar qizning tashqi qiyofasidan hayratda qolishdi va qarsak chalishdi. Shundan so‘ng Anderson pivo brendi bilan hamkorlik qilish taklifini oldi.
Qiz Los Anjelesga ko‘chib o‘tdi va modellik faoliyatini boshladi, keyinchalik uni kinoga ham taklif qilishdi. Anderson uchun birinchi jiddiy rol “Malibu qutqaruvchilari” serialidagi Keysi Jin roli bo‘ldi.
Anderson hech qachon shuhratparast bo‘lmagan — hammasi stadiondagi birgina kadrdan boshlangan. Ammo u bu imkoniyatdan foydalanib, hozirgacha yodda qolgan karyerasini yaratdi.
Baʼzan mashhurlik uzoq yillar davomida mehnat qilinganidan keyin emas, balki tasodifiy uchrashuv, proba yoki kadr orqali keladi. Ushbu yulduzlardan baʼzilari umuman sahna haqida orzu qilmagan, boshqalari shunchaki yoqtirgan ishlarini qilishgan. Ammo taqdir ularni katta maydonga olib chiqdi. Ularning hikoyalari hayot hayratlantirishni bilishiga eslatmadir va baʼzan muvaffaqiyat uchun reja kerak emas — faqat to‘g‘ri vaqtda va to‘g‘ri joyda bo‘lish kifoya.
Izoh (0)