“Isroil go‘zali 2004” unvoni g‘olibi suratga olish jarayonlaridagi murakkab tryuklarni o‘zi bajarishni yaxshi ko‘radi. Gal Gadot suratga olish jarayonida ko‘plab jarohatlar olgan.
38 yoshli isroillik aktrisa Gollivud filmlarida suratga tushib, muvaffaqiyatli karyera qura oldi. U o‘z qad-qomatidagi o‘zgarishlarni diqqat bilan kuzatib boradi va murakkab jang sahnalarida ishonchli ko‘rinish uchun sport bilan jiddiy shug‘ullanadi. Gal so‘nggi “Toshyurak” filmining suratga olish jarayonlarida olgan jarohatlari haqida gapirib berdi.
“Isroil go‘zali 2004” tanlovi g‘olibi uchun josuslar haqidagi trillerda rol ijro etish oson kechmadi. Gadot barcha kaskadyorlik sahnalarini o‘zi bajarishga harakat qildi. Aktrisa o‘zini to‘liq nazorat qilishni yaxshi ko‘radi. Shu nuqtai nazardan, jang sahnalari ham unga yoqimli ko‘rinadi.
“Film yaratishda menga yoqmaydigan narsalar bor. Biroq men jang qilishni va qo‘l jangi bilan shug‘ullanishni juda yaxshi ko‘raman”, — deydi aktrisa.
Suratga olish kunlaridan so‘ng, aktrisaning butun tanasi ko‘karib ketgan. Shu sababdan aktrisa odatdagidek bolalari bilan sayr qilishga chiqqanda o‘tib ketayotgan insonlar unga g‘alati qarab ketayotganini ko‘rib qolgan.
“Qaysidir yakshanba kuni men uch qizim bilan Londondagi parkda sayr qilishga chiqqan edim. Oyog‘im va orqam butunlay ko‘karib ketgan ekan, bu haqda umuman o‘ylamasdan yozgi ko‘ylak kiyib olgandim. O‘sha paytda insonlar menga g‘alati qarab o‘tib ketganini payqadim”, — deydi “Mo‘jizakor” filmi yulduzi.
Bundan tashqari, Gadotning umurtqa pog‘onasi bilan bog‘liq muammolar bor edi. “Ushbu jismoniy rollar tufayli menda bir qator jarohatlar borligi muqarrar. Menda ikkita bo‘yin churrasi va ikkita orqa umurtqa churrasi bor. Afsuski, bu ishning bir qismi”, — deydi ko‘p farzandli aktrisa The Sun nashriga bergan intervyusida.
Gal 48 yoshli isroillik tadbirkor Yaron Versano bilan turmush qurgan. Ular hozirda ittifoqida uch nafar: 12 yoshli Alma, olti yoshli Maya va ikki yoshda bo‘lgan Daniela ismli farzandlarini tarbiyalamoqda.
Gal “Isroil go‘zali” unvoniga ega bo‘lgandan so‘ng, ikki yillik harbiy xizmatni o‘tadi. Keyinchalik u yuridik soha bo‘yicha tahsil oldi va bu vaqtda model sifatida ishladi. 2009-yilda aktrisa “Forsaj” filmida jangchi qiz Jizel Yashar rolini o‘ynadi.
Izoh (0)