Bugungi kunda ushbu aktyor va aktrisalarni butun dunyo taniydi, ammo jahon miqyosida mashhurlikka erishishdan avval ular tasodifan muayyan vaqtda kerakli joyda bo‘lgan oddiy odamlar edi. “RBK-Ukraina” nashri millionlab muxlislarning sevimli yulduziga aylanish uchun san’at sohasida o‘qimagan va boshlang‘ich daromadi bo‘lmagan Gollivud yulduzlarini sanab o‘tdi.
Merilin Monro
“Jazda faqat qizlar” musiqiy filmi yulduzi, amerikalik aktrisa Merilin Monro o‘z faoliyatini san’at bilan bog‘liq bo‘lmagan sohadan boshlagan. 1944-yilda Merilin 17 yoshida samolyot zavodida ishladi. U parashyutlarni sinovdan o‘tkazish bo‘limida fyuzelyajga yong‘inga chidamli modda bilan qoplash ishi bilan shug‘ullangan.
O‘sha kunlarning birida uni YANK nashriyoti suratkashi Devid Konover payqab qoldi. Keyinchalik Monroning fotosurati mazkur jurnal muqovasida paydo bo‘ldi. Shu tariqa Merilin moda va kino olamiga kirib keldi.
Jeyson Steytem
“Forsaj-10”, “Chegarasizlar-4”, “Fortuna operatsiyasi” va “Meg-2: tubsizlik” filmlaridagi rollari orqali mashhur bo‘lgan va katta daromad ko‘rgan britaniyalik aktyor Jeyson Steytem avvallari professional sportchi bo‘lgan. U 12 yil davomida Britaniya milliy suvga sho‘ng‘ish klubi a’zosi bo‘lgan va hatto Olimpiya o‘yinlarida ishtirok etgan.
Intervyularda Steytem sport uning sevimli xobbisi bo‘lgani va bundan avval u London ko‘chalarida atir-upa va zargarlik buyumlarini sotish orqali kun ko‘rgani haqida so‘zlab bergan.
Keyinroq Jeyson model sifatida ishlay boshladi, agar u tasodifan Gay Richi bilan uchrashib qolmaganda, bu sohada qolgan bo‘lardi. Richi “Karta, pul, ikki stol” filmidagi ko‘cha sotuvchisi bilan bog‘liq epizodga aktyor qidirayotgan edi. Shu tariqa Steytem shou-biznes olamiga kirib keldi.
Pamela Anderson
90-yillarda AQSHning eng maftunkor aktrisalaridan biri bo‘lgan Pamela Anderson o‘z faoliyatini Vankuverda fitnes bo‘yicha trener sifatida boshlagan. 1989-yilda Vankuverga ko‘chib o‘tgan Pamela Anderson dugonalari bilan futbolga boradi. O‘yin to‘g‘ridan to‘g‘ri translyatsiya qilinayotgan edi. Operator kamerani almashtirayotgan paytda taniqli pivo kompaniyasi logotipi tushirilgan ko‘k topikdagi Pamelani ko‘rib qoladi. Stadionda bir zum qarsaklar yangradi — bu qarsaklar maydondagi o‘yinga emas, ekranda ko‘rsatilgan go‘zal qizga chalingan edi.
Andersonning modellik karyerasi shundan keyin shakllana boshladi. Barcha fotosuratchilar uni o‘sha yerda suratga olishni xohladi va pivo kompaniyasi Pamning eng muvaffaqiyatli suratlarini sotib oldi va u bilan hamkorlik qildi. Shu tariqa Pamela avval model sifatida tanildi, keyinroq unga filmlardan turli rollar taklif etila boshladi.
Chenning Tatum
Chenning bolaligida turli sport turlari bilan, jumladan, futbol, beysbol, trek va kung-fu bilan faol shug‘ullangan, shu sababli ko‘pchilik uni kelajakda Olimpiya chempioni bo‘ladi, deb o‘ylagan. Oradan vaqt o‘tib, u o‘qishni tashladi, stipendiyasini yo‘qotdi va Mayamiga ko‘chib o‘tdi. U yerda aktyor klubga ishga joylashdi, lekin u raqs emas, modellik agentligi bilan shartnoma imzoladi. Tatum kliplarda suratga tushishga chaqirila boshlandi va shundan keyin kinofilmda rol o‘ynadi.
Evanjelin Lilli
“Hayot-mamot” loyihasi yulduzi hech qachon aktrisa bo‘lishni istamagan, u Air Canada aviakompaniyasida styuardessa bo‘lib ishlagan. Evanjelin bo‘sh vaqtida qo‘shimcha pul ishlash maqsadida ofitsiant bo‘lib ishladi, aynan shu yillarda u menejer Jeff Palffining e’tiboriga tushdi. Jeff Lillining tashqi ko‘rinishini yuqori baholadi va unga model sifatida ishlashni taklif qildi. Natijada u falokat haqidagi mashhur serialda Keyt Ostin roliga tasdiqlandi.
Izoh (0)