Спорт билан шуғулланмаса ҳам, доимо жозибали кўринадиган юлдузлар

Ушну машҳур аёллар нозиклик ва жозибадорликка фақат спортзалда машаққатли меҳнат орқали эришиш мумкин, деган стереотипни йўқ қилади. Табиатан нозик бўлишга муяссар бўлган гўзаллар ҳам бор. Улар ўзларини мунтазам ва чарчатадиган жисмоний машқлар билан бир шаклда ушлаб туришлари шарт эмас.

Эмили Ратаковски

Эмили Ратаковскининг қомати — кўплаб қизларнинг орзуси. Агар модел бундай танага жисмоний машқларсиз эришганини ҳисобга олсак, бу ҳақиқатдан ҳам ғайриоддий нарса деб ҳисоблаш мумкин. Юлдуз туғуруқдан кейин имкон қадар тезроқ тикланиш учун ўз қоматини диққат билан кузатиб борди. Аммо умуман олганда, у спорт залини ёқтирмайди ва ўзининг нозик ҳамкасблари сингари у ерга ташриф буюрмайди. Ратаковскининг бундай таранг ва жозибали бўлиб қолишига ёга ва тўғри овқатланиш ёрдам беради, бундан ташқари у ўзини баъзан калорияга бой ширинликлар билан ҳам сийлайди.

“Тренерим йўқ, спортзалга бормайман. Биз дўстларимиз билан сайр қиламиз, пиёда саёҳатларга чиқамиз. Фитнесга қизиқмайман, соҳамда мени оқ қарға деб аташ мумкин. Ўйлайманки, вақти-вақти билан ўзингизни ортиқча нарсалар билан сийлаш мумкин. Мен чипслар учун ақлдан озмайман, лекин эрталаб кекс ёки круассан билан ўзимни сийлашни яхши кўраман”, деб бўлишди модел интервьюда.

Рианна

Баъзида Рианнада гантел кўтариш ва фитнес билан шуғулланиш истаги пайдо бўлади. Хонанда бу танага жуда фойдали эканини тушунади ва олдинги интервьюларида у мунтазам равишда машқ қилишни хоҳлаётганини бир неча бор айтган. Аммо бу мотивация тезда йўқолади — юлдуз спорт билан шуғулланишда интизомни ҳали ҳам шакллантира олмади. Бошқа интервьюларида Рири жисмоний машқлар ва спорт залига бориш унинг учун эмаслигини айтди. Бу жуда зерикарли ва ҳолдан тойдиради. Ҳатто хонанда бир неча килограмм ортиқча вазн олган бўлса ҳам, у ўзини қулай ва ишончли ҳис қилади. Ва бу аёл ўзига бўлган ҳурмат учун энг муҳим нарса!

“Мен спорт залига боришни ёқтирмайман, бу эски урф. Мен жуда оддий, одатий ва яхши маълум бўлган ҳамма нарсадан нафратланаман, бундан жуда тез зерикаман”, деб таъкидлади Рири.

Эмма Стоун

Эмма Стоун эса спортни, диетани ва бошқа ҳар қандай чекловларни умуман ёқтирмайди. Актрисага жисмоний машқлар билан шуғулланиш ёки ўзини бирор нарсада чеклаш керак бўлганда, бу уни ғазаблантиради. Лекин шунга қарамай, у қанчалик нозик ва жозибали! Эмма ўзининг идеал параметрларини организмдаги тез модда алмашинуви ва табиий равишда ўзига берилган қомат тузилиши билан изоҳлайди. Аммо қизиқ, агар Стоун нозикликка мойил бўлмаса, спортга қандай муносабатда бўларди?

“Мен тош кўтарганимда ғазабланишимни пайқадим. Умуман олганда, бу мен қилишни истаган нарса эмас”, деб тушунтирди юлдуз.

Приянка Чопра

Актриса ижтимоий тармоқларда фаол равишда блог юритади ва ҳар бир қадамини қайд этади. Нима учун у ҳозиргача спорт залидан битта ҳам фотосурат жойламаган? Аслида Приянка Чопра у ерга умуман бормайди. Албатта, у кадрда ажойиб кўриниш учун идеал шаклда бўлишни хоҳлайди. Аммо бунда унга спортдан кўра генлари кўпроқ ёрдам беради. Актриса табиатан ажойиб танага эга бўлиш бахтига муяссар. Агар Приянка баъзан танаси учун фойдали машқлар қилса ҳам, у “юмшоқ” ва кам юкламали — масалан, ёга билан шуғулланади.

Интервьюда Чопра “Malibu қутқарувчилари” фильмини суратга олиш жараёнида ундан бошқа бутун актёрлар таркиби, чўмилиш кийимларида ажойиб кўриниш учун спорт залида деярли яшаб қолиб шуғулланишганини эслади.

“Аслида, мен спорт залларининг мухлиси эмасман. Мен генетик жиҳатдан ҳинд генларим туфайли ортиқча вазнга мойил эмасман. Машқ қилишим шарт эмас, лекин Келлй Роҳрбач мени у билан машқ қилишим кераклигига ишонтиришга ҳаракат қилади. Ҳар куни эрталаб у мени залга боришга мажбур қилганда, мен шунчаки: о-о-о, мен яна ярим соат ухлашим мумкинми, деб жавоб бераман. Улар тинмай машқ қиладилар! Мен эса гамбургерим билан бирор жойга яширинишга ҳаракат қиламан”.

Меган Фокс

Интернетда Меган Фокснинг турмуш тарзи ҳақида бир-бирига зид маълумотлар мавжуд. Илгари хорижий оммавий ахборот воситалари актриса фаол равишда машқ қилишини таъкидлаган, кейинчалик эса у жисмоний машқларни ёқтирмаслиги ва спорт залига бормаслиги ҳақида ёзишни бошлади. Кимга ишониш керак? Ўзингизнинг сезгингизга! Юлдуз ижтимоий тармоқларда фаол бўлганида ҳам, спорт залидан фотосурат жойлаган эмас. Бундан ташқари, спорт билан шуғуллангандан кўра Меганни яна бир пластик жарроҳлик амалиётига осонгина кўндириш мумкин. Баъзан орзу қилинган танани жарроҳлик амалиёти билан яратиш, спорт билан узоқ ва тинимсиз шуғулланишдан кўра осонроқ ва тезроқ бўлади. Фокс жисмоний фаолиятни ёқтирмаслигини тасдиқловчи яна бир сабаб — бу унинг шу ҳақда айтган ҳазили:

“Мен машқ қилмайман. Агар Худо эгилишимни хоҳласа, олдимда полга олмосларни сочган бўларди”.