Leonardo Vilgelm Di Kaprio — amerikalik aktyor va prodyuser, “Oltin globus” va “Oskar” mukofoti sovrindori. U zamonamizning eng taniqli, iste’dodli Gollivud aktyorlaridan biri. Di Kaprioni nafaqat afsonaviy “Titanik” filmi mashhur qilgan, balki u faol ekologiya himoyachisi va avtomobil ishqibozi sifatida ham tanilgan.
Foto: Kinorium
Yulduzning avtoparkida turli rusumdagi avtomobillarni topishingiz mumkin. Uning har bir mashinasida qulaylik va hashamat bilan birga tabiatni saqlab qolish istagi namoyon bo‘lishiga guvoh bo‘lishingiz mumkin.
Tesla Roadster
Di Kaprio Tesla kompaniyasini qo‘llab-quvvatlagan birinchi yulduzlardan biri bo‘lgan. Roadster sport ekeltromobili mashinalar ishlab chiqarish sanoatiga yangicha yondashuv timsollaridan biriga aylangan. Mazkur model mukammal dizayn va quvvatni o‘zida mujassam etgan bo‘lib, atigi 3,7 soniyada soatiga 0 dan 100 kilometrgacha tezlikka o‘ta oladi.
Fisker Karma
Aktyor bisotidagi avtomobillar ro‘yxatiga Fisker Karma gibridi ham kiritilgan. Ushbu model sanoatdagi ilk hashamatli gibrid mashinalardan biri bo‘lgan. To‘rt o‘rindiqli sportkarning umumiy quvvati 402 ot kuchiga ega ikkita elektromotor bilan jihozlangan. Mashina faqat elektr quvvatida 80 km gacha, gibrid rejimda esa 485 km gacha yura oladi. Shu bilan birga, avtomobil 5,9 soniyada 100 km/soat tezlikka chiqa oladi. Gibridning maksimal tezligi soatiga 200 km ga yetadi.
Toyota Prius
Umumiy boyligi millionlab dollar bo‘lgan kinoyulduz uchun bu tanlov kamtarona ko‘rinadi, biroq aynan Toyota Prius bir vaqtlar Di Kaprioning ekologik qadriyatlarga sodiqligining namunasiga aylandi. Ushbu gibrid avtomobil uzoq yillar davomida uning asosiy transport vositasi bo‘lib kelgan. Mashina yuqori qismida joylashgan quyosh panellari ekologik toza dvigatelni quvvatlantirishga yordam beradi. Shuningdek, Toyota Prius juda tejamkor bo‘lib, 1 litr benzin bilan 42 kilometr bosib o‘tish imkonini beradi.
Lexus RX Hybrid
Di Kaprioni ko‘pincha qimmatbaho, ammo tejamkor krossover bo‘lgan Lexus RX Hybrid mashinasini boshqarayotganida uchratishgan. Mazkur avtomobilga o‘rnatilgan gibrid texnologiya ishlab chiqariladigan chiqindilar miqdorini kamaytiradi, zamonaviy dizayn va keng salon esa qulaylik baxsh etadi.
BMW i8
Ekologiyani asrab-avaylash harakatlariga sodiq bo‘lgan Leonardo BMW i8 modelini ham e’tibordan chetda qoldirmagan. Ushbu gibrid sport avtomobili o‘zida kuchli dvigatel va elektr motorni birlashtirgan. Bundan xulosa qilish mumkinki, Gollivud yulduzi Leonardo Di Kaprioning mashinalar kolleksiyasi nafaqat qulaylik va tezlik uchun, balki atrof-muhitni muhofaza qilish uchun ham xizmat qiladi.
Izoh (0)