Ko‘pchilik kinolarda buyuk qirol va qirolichalar rollarini ijro etgan. Ammo ularning avlodi bo‘lish sharafiga har kim ham erisholmaydi. Ba’zi san’atkorlarning shajarasi ularning filmografiyasi kabi hayratlanarli. Avlod-ajdodlari butun mamlakatlar taqdirini hal qilgan aktyorlar haqida so‘z yuritamiz.
Tilda Suinton
“Oskar” mukofoti sohibasi Shotlandiyaning eng qadimiy Suinton urug‘laridan birining vakili. Uning shajara tarixi uzoq o‘tmishga borib taqaladi. Bundan tashqari, noodatiy ko‘rinishga ega bo‘lgan bu aktrisа XIV asrda Shotlandiyani inglizlar hukmronligidan ozod qilgan Bryuslar sulolasidan bo‘lmish qirol Robert I avlodidir.
Ma’lum bo‘lishicha, Tilda Suintonning maktabdagi sinfdoshi malika Diana bo‘lgan. Bir paytlar Tildaning ota-onasi qizlarini gersogga uzatmoqchi bo‘lgan, ammo qiz aslzodaligiga qaramay, aktrisalik yo‘lini tanlagan.
Kit Xarington
“Taxtlar o‘yini” serialida temir taxtning qonuniy vorisi bo‘lishidan oldin, Kit Xarington aslida haqiqiy hayotda ham oliynasab. Uning to‘liq ismi — Kristofer Keytsbi Xarington — Britaniya tarixidagi ikki mashhur sulolaga mansub. Uning ota tomondan ildizlari qirol Charlz II Styuartga borib taqaladi. Qizig‘i shundaki, aktyorning rafiqasi Rouz Lesli, serialda Jon Snouing sevgilisi Igritt rolini ijro etgan. U ham Kit bilan bir xil tarixiy ildizlarga ega, chunki Charlz II ning avlodi hisoblanadi.
Keytsbi familiyasi ham bejiz emas. 1605-yilgi mashhur Porox fitnasining tashkilotchisi Robert Keytsbi Xaringtonning ona tomondan bobosi hisoblanadi.
Anjelina Joli
Gollivud yulduzi Fransiya tarixining qadimiy asrlariga borib taqaluvchi ildizlarga ega. Uning ona tomondan shajarasi 1180-1223-yillarda hukmronlik qilgan Fransiya qiroli Filipp II Avgust bilan bog‘liq. Bu Anjelina Jolini Yelizaveta II ning 26-amakivachchasi ekanligini anglatadi.
Anjelinaning sobiq turmush o‘rtog‘i Bred Pitt ham zodagonlardan. Aktyor XII asrda yashagan Genrix II Plantagenetning avlodi hisoblanadi.
Robert Pattinson
Genealogik tadqiqotlarga ko‘ra, Robert Pattinson shahzodalar Uilyam va Garrining uzoq qarindoshi hisoblanadi.
Bundan tashqari aktyor Britaniya qirollik oilasi orqali Vlad Drakula nomi bilan tanilgan Vlad III Tepeshning avlodi hisoblanadi. Bu Ruminiya knyazi edi, uning asosida Brem Stoker afsonaviy vampir obrazini yaratgan. Taqdirning hazilini qarangki, aynan “Sumerki” filmdagi roli Pattinsonni butun dunyoga mashhur qilib yubordi.
Hilari Daff
“Zolushka hikoyalari” komediyasi va “Lizzi Maguayr” serialida tanilgan amerikalik aktrisa va qo‘shiqchi Vindzorlar sulolasi bilan qarindoshlik aloqalariga ega. Hilari Daffning shajarasi Angliya hukmdori Eduard III gacha borib taqaladi. Monarxning chevarasi Aleksandr Spotsvud Virjiniyaga ko‘chib kelgan britaniyalik zobit edi. U AQSHdagi dastlabki mustamlakachi gubernatorlardan biriga aylandi.
Bundan tashqari, Daff Tilda Suinton singari Shotlandiya hukmdori — qirol Robert I Bryus bilan ham qarindoshlik rishtalariga ega.
Izoh (0)