Barcha yosh yulduzlar ham Gollivud cho‘qqisida o‘z o‘rnini saqlab qololmaydi. Bu turli sabablarga ko‘ra yuz beradi: studiyalar voyaga yetgan aktyorlarga qiziqishini yo‘qotishi mumkin yoki san’atkorlarning o‘zi ongli ravishda boshqa yo‘lni tanlashi mumkin.
Eysa Batterfild
Ingliz yozuvchisiga jahon shuhratini “Yo‘l-yo‘l pijamali bola” nomli Xolokost haqidagi drama keltirdi. O‘shanda Eys Batterfild 11 yoshda edi, biroq u o‘zining ta’sirchan ijrosi bilan barchani maftun etdi. Rejissyor Mark Xerman esa keyinchalik kastingda yuzlab boshqa nomzodlarni ko‘rgach, Batterfild aynan ular izlayotgan yigit ekanini tushunadi.
Bir necha yil o‘tib, Eys “Vaqt qo‘riqchisi” filmida yosh ixtirochi Xyugo rolini ijro etadi. “Ender o‘yini” fantastik filmidagi bosh rol esa uning muvaffaqiyatini yanada mustahkamladi. 2014-yilda aktyor “X+Y” melodramasida autizm bilan og‘rigan qahramon rolini o‘ynaydi. Keyin “Miss Peregrinning bolalar uyi”, “Oramizdagi koinot” filmlarida suratga tushadi.
Freddi Xaymor
Aktyor yetti yoshidan filmlarda suratga tusha boshlagan va 12 yoshida “Sehrli mamlakat” fantastik filmida Keyt Uinslet va Jonni Depp bilan ishlash imkoniyatiga ega bo‘lgan. Keyinchalik Jonni Depp Freddi Xaymorga “Charli va shokolad fabrikasi” filmida rol taklif qilgan.
Vaqt o‘tishi bilan Charli Baket rolini ijro etgan aktyorga tobora ko‘proq dramatik rollar berilgan. “Beytslar moteli” seriali uning uchun burilish nuqtasi bo‘ldi, unda Freddi Norman Beyts obrazini gavdalantirgan va hatto bir nechta qismlarni o‘zi rejissyorlik qilgan. Tomoshabinlar Xaymorning ijrosini maqtab, har kim hamdardlik uyg‘otadigan telba rolini o‘ynay olmasligini ta’kidlagan. “Yaxshi shifokor” serialidagi autizm bilan og‘rigan jarroh Shon Merfi obrazi aktyorga “Oltin globus” mukofotiga birinchi marta nomzod bo‘lish imkonini berdi.
Josh Xatcherson
“Hayot-mamot o‘yinlari” jangari filmida Kitniss Everdinning sodiq hamrohi Pit obrazi aktyorga katta shuhrat keltirdi. Biroq Josh Xatcherson dastlabki rolini 10 yoshida Piter Falk bilan “Yovvoyi kunlar” filmida ijro etgan, keyin esa “Kichkina Manxetten” romantik komediyasida va “Terabitiya mamlakati” fantastik filmida yorqin iz qoldirgan.
2014-yilda Xatcherson Benisio Del Toro bilan “Yo‘qolgan jannat” trillerida prodyuser sifatida o‘zini sinab ko‘rdi. Josh turli xil loyihalarda rol ijro etishni davom ettirmoqda, ular orasida “Asalarichi” jangari filmi va “Freddi bilan besh kecha” dahshatli filmi ham bor.
Tomas Brodi-Sangster
Xyu Grantning amakivachchasi birinchi marta ekranda 2001-yilda “Mo‘jiza” melodramasida saraton kasalligiga chalingan bola rolini ijro etgan. O‘n yoshida Tomas Brodi-Sangster “Gitler: Iblisning yuksalishi” harbiy dramasida yosh fyurer rolini o‘ynaydi. “Haqiqiy sevgi” romantik komediyasi, “Patli bola” mini-seriali va “Mening dahshatli enagam” komediyasi aktyorga muvaffaqiyat keltiradi.
Biroq haqiqiy yutuqqa Tomas “Jon Lennon bo‘lish” biografik filmida yosh Pol Makkartni rolini ijro etganda erishadi. “Labirintda yuguruvchi” o‘smirlar fantastik filmidagi roli esa san’atkorni yangi bosqichga olib chiqadi. Hozirda Tomas Avstraliyada yangi hayot boshlashga qaror qilgan sobiq o‘g‘ri rolini ijro etayotgan “Epchil firibgar” seriali bilan band.
Sirsha Ronan
“Qutqarish” filmidagi aktyorlik debyuti uchun Sirsha Ronan “Oskar”ga nomzod bo‘lgan, o‘shanda u atigi 13 yoshda edi. Shundan so‘ng takliflar ketma-ket kela boshladi, ammo Sirsha Piter Jeksonning “Yoqimtoy suyaklar” dramasidagi bosh rolidan keyin mashhur bo‘ladi.
Ronan bir vaqtning o‘zida ikkita mashhur rejissyorning ilhom manbaiga aylandi. Ues Anderson qizni “Grand Budapesht mehmonxonasi” va “Fransuz gazetasi” filmlariga taklif etadi. Greta Gervig esa mallasoch qizni “Xonqizi” va “Kichkina ayollar” filmlarida markaziy qahramonga aylantiradi — so‘nggi loyihadagi roli Sirshaga “Oltin globus” mukofotini olib keladi.
Izoh (0)