Kino va filmlardagi roli, bir-biridan ajoyib qo‘shiqlar taqdim qilishi bilan mashhur bo‘lgan yulduzlardan kimlar o‘zini moda olamida ham sinab ko‘rgani haqida ma’lumot berib o‘tamiz.
Viktoriya Bekxem
Futbolchi Bekxemning rafiqasi 2009-yilda Viktoria Beckham brendiga asos solgan. O‘ziga xos kiyinish uslubiga ega ekani bilan ma’lum bo‘lgan dizayner kolleksiyalariga ham nozik did bilan yondashadi. Uning moda olimga kirib kelgan boshqa shou-biznes vakillaridan farqli o‘laroq kiyimlarni vaqtinchalik trendlardan kelib chiqib yaratmaydi, qaytanga o‘z yo‘lidan borib, bashang bichimlardan foydalanishni afzal biladi. Sipolik hamda minimallik bilan birga ayollarga xos jozibaga urg‘u berish Viktoriyaning tashrif qog‘ozi hisoblanadi. O‘zining to‘plamidagi kiyimlarni o‘zi kiyish mumkin bo‘lgan dizaynerga ortiqcha reklamaning keragi yo‘q.
Pippa Middlton
Pippa ancha avval xayriya maqsadida dizaynerlik faoliyatini boshlab yuborgan. Kembrij gersoginyasining singlisi londonlik dizayner Tabita Vebb bilan hamkorlik qilishi e’lon qilgan. Ko‘ylak sharflar dizaynini taqdim qilgan Pippa sotuvdan tushgan barcha mablag‘ni The British Heart Foundation xayriya fondiga sarflagan.
Rozi Xantington-Uaytli
O‘zining shaxsiy kosmetika brendini rivojlantirish bilan band bo‘lgan Rozi kollaboratsiya taqdim qilish uchun mashhur morda markalari bilan ham hamkorlik qilib ulgurgan. Gia Borghini poyabzal brendi bilan birgalikda taqdim qilgan kolleksiyasi eng yaxshi loyihalardan biri bo‘lgan.
Ledi Gaga
Iti Miss Aysha Kinnidan ilhomlangan xonanda hayvonlarga bag‘ishlangan kiyim va mahsulotlar to‘plamini taqdim qilgan. Shuningdek, 2017-yilda Amerikaning Urban Outfitters brendi bilan hamkorlikda kolleksiya yaratgan ijodkor 2019-yilda o‘z shaxsiy kosmetika tarmog‘ini yo‘lga qo‘ygan.
Anjelina Joli
Gollivud yulduzi Style of Jolie nomli zargarlik kolleksiyasini taqdim qilib ulgurgan. Undan qimmatbaho toshlar bilan bezatilgan zirak, uzuk va marjonlar o‘rin olgan. Bundan avvalroq ham u tomonidan “Himoyachi” nomli taqinchoqlar taqdim qilingan edi.
Ivanka Tramp
Biznesdagi faoliyati va modelligi bilan yaxshi ma’lum bo‘lgan Ivanka o‘zini dizayner sifatida ham sinab ko‘rishga qaror qilgan. Qulay kiyim-kechaklar ishlab chiqarishni boshlagan kichik xonim 2018-yilga kelib ushbu biznesga nuqta qo‘yishga qaror qilgan.
Natali Portman
Nafaqat aktrisa, balki ijtimoiy va ekologik muammolarga befarq bo‘lmagan faollardan hisoblangan Natali Richard Mille brendiga soatni dizaynlashga yordam bergan. Qimmatbaho aksessuarning sotuvidan to‘plangan mablag‘ning bari Freethe Children nomli bolalar fondiga xayriya qilingan. Shuningdek, 2008-yilda ekologik poyabzallar kolleksiyasini ham taqdim qilib ulgurgan. Ammo narxi qimmat ekani sabab unchalik bozori chaqqon bo‘lmagan.
Jastin Timberleyk
2005-yilda Jastin eng yaqin do‘st Treys Ayala bilan birgalikda William Rast nomli kiyimlar brendiga asos solgan. 2010-yilda yil brendi deb topilgan William Rast’ning mashhurligi bora-bora kamaya boshlagan. Bugunga kelib marka One Jeanswear bilan birlashtirilgan, xonanda esa faol ravishda kollabratsiya yaratishdan charchamaydi. 2018-yilda qo‘shiqchi mashhur brend bilan birgalikda The Levi’s x Justin Timberlake Fresh Leaves nomli kolleksiya taqdim qilgan.
Gven Stefani
Har bir ayolni go‘zal va o‘ziga qarab yurishini istagan Gven 2003-yilda L.A.M.B. nomli brendga asos solgan. Nom borasida esa o‘zining “Love. Angel. Music. Baby” deb ataluvchi qo‘shig‘idan ilhomlangan. Brend kiyim-kechak, aksessuarlar, atir hamda soatlar ishlab chiqarishi bilan yaxshi ma’lum.
Madonna va uning qizi Lurdes Leon
Ona-bola 2010-yilda Material Girl nomli brendga asos solgan. Lurdes 12 yoshligidayoq Material Girl’ning konsultanti bo‘lib ulgurgan. Keyinchalik tarmoqni rivojlantirishga qaror qilingan hamda kosmetika va ustki kiyimlar ham ishlab chiqarila boshlangan.
Meri-Keyt va Eshli Olsen
Opa-singillar 2006-yilda ayol va erkaklar uchun kiyim ishlab chiqarishga mo‘ljallangan The Row brendiga asos solgan. Moda ixlosmandlari orasida bir zumda mashhur bo‘lib ulgurgan brenddagi liboslarni Meri-Keyt va Eshli Olsenning o‘zi ham kiyishni kanda qilmaydi.
Keyt Moss
Model sifatida ham faoliyat yuritishga muvaffaq bo‘lgan Keyt o‘zini dizayner sifatida ham sinab ko‘rishga qaror qilgan. Equipment fransuz markasi bilan taqdim qilgan kolleksiyasi eng yaxshi hamkorlik namunasi bo‘lgan. Qolaversa, 2010-yilda Kate Moss for Longchamp nomli sumka ishlab chiqarishga mo‘ljallangan shaxsiy brendiga ham asos solgan.
Kim Kardashyan
Kim uyda kiyishga mo‘ljallangan Skims nomli brendning asoschisi hisoblanadi. 2021-yilda markaning AQShning olimpiya terma jamoasi bilan hamkorlik qilishi e’lon qilingan. Qolaversa, Kardashyan opa-singillari bilan birgalikda The Kardashians taqinchoqlar kolleksiyasini ham taqdim qilib ulgurgan. 2010-yilda esa Bebe brendi bilan hamkorlikda Kardashian by Bebe nomli opa-singillar uslubidagi liboslar to‘plami taqdim qilingan.
Beyonse
2005-yilda Beyonse onasi Tina Nouz bilan birga House Of Dereon nomli zamonaviy liboslar ishlab chiqarishni yo‘lga qo‘ygan. Brend mashhur tikuvchi sifatida ma’lum bo‘lgan xonandaning buvisi Agness Dereon sharafiga nomlangan. Sal avvalroq esa Beyonse Ivy Park sport brendi bilan hamkorlikni boshlaganini e’lon qilgan.
Sara Jessika Parker
2007-yilda Sara Bitten nomli liboslar tarmog‘ini ishlab chiqarishni yo‘lga qo‘ygan. Oddiy odamlar xaridi uchun mo‘ljallangan libosga belgilangan narx 19,98 dollardan oshmagan. Bu bilan cheklanmagan Sara 2010-yilda Halston brendi uchun kiyimlar kolleksiyasini taqdim qilgan. 2014-yilga kelib esa Nordstrom gipermarketlar tarmog‘i uchun poyabzallar kolleksiyasini ishlab chiqargan. 2018-yilga kelib esa aktrisa Gap brendi bilan hamkorlikda bolalar uchun kolleksiya taqdim qilgan.
Timati
Reper 2006-yilda Black Star by TIMATI nomli kiyimlar tarmog‘ini yo‘lga qo‘ygan. Kundalik kiyishga mo‘ljallangan liboslarni o‘z ichiga oladigan Black Star Wear do‘konini Rossiyaning deyarli har bir shahrida uchratish mumkin. Keyinchalik bolalarga mo‘ljallangan kolleksiya taqdim qilgan xonanda 2020-yilga kelib ushbu biznes bilan shug‘ullanmay qolgan.
Izoh (0)