Rolga ega bo‘lish uchun nafaqat katta hajmdagi ssenariyni eslab qolish, ishonarli qilib yig‘lash, ba’zan esa notanish tilni o‘rganishga ham to‘g‘ri keladi. Albatta, bularning barchasi muhim, ammo yana bir narsa bor, bu yanada qiyinchilik bilan kechadi — bu ozish yoki vazn to‘plash.
Bugungi qahramonlarimiz obrazlariga maksimal darajada o‘xshash uchun bu qadamni tashlashga jur’at etgan.
Rene Zellveger
Rene 30 yoshdan oshgan erkin qiz haqida hikoya qiluvchi “Brijit Jonsning kundaligi” filmi tufayli shuhrat qozonadi. Qahramonning zararli odatlari yetarli, ozish istagi bor, lekin sevgan yigiti yo‘q.
Suratga olish ishlaridan bir necha oy oldin Zellveger tez tayyorlanadigan oziq-ovqat sotib olar va uni gazlangan ichimlik bilan ichardi. Natija — 14 kiloga semirib, elliginchi o‘lchamdagi kiyim kiya boshlaydi.
Har kuni u 4000 kilokaloriya iste’mol qiladi, filmning uchinchi qismiga qadar sport zali bilan xayrlashadi. Faqat shundagina uning qahramoni syujet bo‘yicha kerakli natijaga erishadi.
Rene tan olganidek, “Brijit Jons” uni sinovdan o‘tkazdi, chunki har kimning ham avvalgi qomatiga qaytishga kuchi yetmaydi. Aktrisaga yordam bergan asosiy narsa — sport zali edi.
Jared Leto
“Oskar” va “Oltin globus” mukofotlari sohibi, “Thirty Seconds to Mars” guruhi solisti, doimo navqiron Jared Letto avvaliga “Orzu uchun rekviyem” va “Dallas xaridorlar klubi” filmlari uchun ozadi, keyinchalik esa “27-bob” filmidagi Mark Chapman nomli g‘alati qahramoni uchun vazn yig‘adi.
Letto bu rol uchun 30 kilogrammga semiradi — bunga makaron, muzqaymoq, pitssa, kola va shokoladli batonchiklar sabab bo‘ladi. Aktyor bu jarayonga shunchalik berilib ketadiki, hatto shifokorlar nazoratida bo‘lishiga to‘g‘ri keladi.
Sharliz Teron
2003-yilda Sharliz Teron bosh rolni ijro etgan “Maxluq” filmi ekranlarga chiqadi. Bu rol uchun u hozircha yagona bo‘lgan “Oskar” mukofotini qo‘lga kiritadi.
Sharliz ijro etgan qahramon telba qotil Eylin Uornos edi. Bu rol uchun aktrisa nafaqat 15 kiloga semiradi, balki qoshlarini ham qirib, sun’iy jag‘ taqadi.
14 yil o‘tgach, Teron yana o‘sha usulga qaytadi — “Talli” tragikomediyasida u roli uchun 22 kilogramm vazn to‘plab, ko‘p bolali ona obrazini yaratadi. Ushbu film ustida ishlash jarayonidan so‘ng, aktrisa tanasidagi keskin o‘zgarishlar uni tushkunlikka, ruhiy azoblarga va uyqu buzilishiga olib kelganini e’tirof etadi:
“Uch hafta davomida nosog‘lom ovqatlanganim menga qiziqarli tuyulmay qoldi. Ovqatlanish majburiyatim va ishimga aylandi: har kuni belgilangan miqdordagi kaloriya iste’mol qilishim shart edi. Tushkunlikka tushib qoldim. Hayotimda ilk bor shunchalik ko‘p qayta ishlangan mahsulotlar va shakar iste’mol qildim”, deydi aktrisa.
Bredli Kuper
Model Irina Sheykning sobiq sevgilisi, qizining otasi Bredli Kuper “Vegasdagi to‘y”, “Stvolli yigitlar”, “Mening yigitim — telba” “Qarag‘aylar ostida” filmlari yulduzi va o‘n ikki karra “Oskar” mukofotiga nomzod 2014-yilda semirib ketadi. O‘shanda u “Snayper” filmida Kris Kayl rolini o‘ynayotgandi.
Kuper nafaqat 18 kilo vazn yig‘adi, balki baquvvat erkakka aylanadi — o‘shanda uning butun vazni mushakka aylangandi.
Mettyu Makkonahi
“Oltin” filmidagi roli uchun Metyu olti oy ichida 20 kilogramm vazn to‘playdi va jarayon unga quvonch keltiradi:
“Vazn to‘plash ancha qiziqarli jarayon. Yarim yil davomida istagan vaqtimda xohlagan narsamni qila olardim. Tunda pitssa yeyish? Bemalol. Nonushtaga pivo bilan chizburger? Bu ham yaxshi fikr. Men chindan ham semirib ketdim va tez orada yaxshigina qorin soldim”, deydi u.
Aktyorning so‘zlariga ko‘ra, ozishiga shaxsiy shifokor tavsiyasiga ko‘ra bir necha oy davomida ichgan maxsus choy yordam bergan.
Ammo “Dallas xaridorlar klubi”dagi rol uchun u aksincha, 20 kiloga ozadi, chunki uning qahramoni OITS bilan kasallangan va vazn yo‘qotish kasallik sindromlaridan biri edi. Aktyor sog‘lig‘iga zarar yetkazmaslik uchun o‘z diyetologi nazorati ostida ozadi.
Robert De Niro
Martin Skorsezening “Quturgan buqa” filmidagi Jeyk Lomott (amerikalik bokschi, o‘rta vazn toifasida sobiq jahon chempioni) roli uchun Robert De Niro “Eng yaxshi erkak roli” nominatsiyasida “Oskar”ga sazovor bo‘ladi. Shubhasiz, mukofot aktyorning sa’y-harakatlarini oqlaydi, chunki roli uchun u 27 kilogramm vazn to‘plagandi. Bu hatto rejissorni xavotirga soladi — u aktyordan bunchalik ko‘p vazn yig‘ishni so‘ramagandi (uni muashakdor qilib ko‘rsatish uchun atigi to‘qqiz kilo yetarli edi).
Enn Xeteuey
“Xo‘rlanganlar” filmida o‘layotgan Fantina rolini o‘ynash uchun aktrisa qattiq parhezga o‘tiradi. U qiynaladi, lekin 11 kilogramm yo‘qotadi. Ko‘p o‘tmay, Enn uyqu buzilishi muammosiga duch keladi, unda gallyutsinatsiyalar paydo bo‘lib, qorni og‘riydi — bu kam ovqatlanishning natijasi edi. U kuniga bor-yo‘g‘i ikki bo‘lak sulili non yer, ba’zan esa rediska va latuk salatini chaynardi.
Xeteuey shuncha mashaqqat chekkani uchun “Ikkinchi plandagi eng yaxshi ayol” roli uchun “Oskar” bilan taqdirlanadi.
Izoh (0)