Ba’zi aktyor va aktrisalarning farzandlari san’at olamiga osongina kirib kelgan bo‘lsa-da, bu ularning muvaffaqiyati faqat oilaviy meros ekanini anglatmaydi. Kimdir ota-onasining shon-shuhrati soyasida qolib ketgan bo‘lsa, yana kimdir o‘z mehnati va iqtidori bilan kino olamida mustaqil yulduzga aylangan. Ushbu maqolada o‘z mehnati orqali kino sohasida yo‘lini topgan yosh aktyor va aktrisalar haqida so‘z yuritamiz.
- Patrik Shvarsenegger
Afsonaviy aktyor Arnold Shvarsenegger va telejurnalist Mariya Shrayverning o‘g‘li Patrik 1993-yil 18-sentyabrda Los Anjelesda tug‘ilgan. Uning kino sohasidagi debyuti 2006-yilda 10 yoshida, “Zaxiradagilar o‘rindig‘i” (Bench Warmers) sport komediyasida bo‘lgan. Biroq undan keyin Patrik uzoq vaqt kinodan chetda qolib, ta’lim oldi va aktyorlik kurslarida o‘qidi. Shu bilan birga, u modellik faoliyatini ham olib bordi.
2010-yillarning boshlarida u faqat kichik rollarga ega bo‘lgan. Biroq asosiy rolini 2018-yilda “Tungi quyosh” (“Midnight Sun”) dramasida ijro etdi, keyin esa “Chikago bandasi” kriminal va jangovar filmida ishtirok etdi. “Zinapoya” biografik detektiv trillerida u bosh qahramonning o‘g‘li Todd Piterson obrazini gavdalantirdi.
Patrikning eng so‘nggi ishlari orasida 2025-yil 16-fevralda boshlangan “Oq nilufargul” (”White Lotus”) serialining uchinchi mavsumi ham bor.
- Lili-Rouz Depp
Gollivudning eng chiroyli juftliklaridan biri Jonni Depp va Vanessa Paradining qizi Lili-Rouz Melodi Depp aktrisa va model sifatida tanilgan. Uning kinodagi debyuti 2014-yilda Kevin Smitning “Fil tishi” (“Tusk”) komedik horror filmida bo‘lgan. U yerda Lili ikkinchi darajali rol o‘ynagan bo‘lsa-da, otasi Jonni Depp va rejissyorning qizi Xarli Kvin Smit bilan birga ishlash imkoniyatiga ega bo‘lgan. Keyinchalik uning qahramoni “Yoga ixlosmandlari” (“Yoga Hosers”) filmida asosiy rolga aylangan, ammo bu loyiha salbiy baholangan.
Aktrisalik bilan parallel ravishda Lili-Rouz model sifatida Chanel va Karl Lagerfeld bilan hamkorlik qilgan. “Raqqosa” (“The Dancer”) va “Vafoli yor” (“A Faithful Man”) filmlaridagi ishtiroki unga “Sezar” mukofotiga nomzod bo‘lish imkoniyatini bergan.
Lili-Rouzning muhim rollaridan biri “Qirol” (“The King”) filmidagi Fransiya malikasi Ketrin Valua obrazi bo‘lib, bu filmda Timoti Shalame bilan juftlik obrazini ijro etgan.
- Margaret Kuolli
1990-yillarning romantik komediyalar yulduzi Endi MakDauell va sobiq model Pol Kuollining qizi Margaret Kuolli ham model sifatida faoliyatini boshlagan, shuningdek, balet maktabida tahsil olgan.
Uning kinematografiyadagi ilk ishi “Palo Alto” dramasida bo‘lgan. Keyinchalik “Yaxshi yigitlar” (“The Nice Guys”), “Sidney Hollning yo‘qolishi” (“The vanishing of Sydney Hall”) va “Fosse/Verdon” seriallarida ishtirok etgan. Kventin Tarantinoning “Bir vaqtlar Gollivudda” filmida esa qisqa, ammo yorqin obraz yaratgan.
Shuningdek, u Yorgos Lantimosning “Bechoralar-baxtsizlar” va “Mehri-shafqat turlari” (“Kinds of kindness”) filmlarida ham ishtirok etgan. Eng katta yutuqlaridan biri esa unga “Oltin globus” nominatsiyasini taqdim etgan “Substansiya” filmidir.
- Jek Kueyd
Jek Kueyd 1992-yil 24-aprelda Gollivud yulduzlari Meg Rayan va Dennis Kueyd oilasida tug‘ilgan. Uning ilk kinodagi chiqishi 2012-yilda “Hayot-mamot o‘yinlari” (“The Hunger Games”) filmida bo‘lib, u yerda Marvel ismli tribunni o‘ynagan.
U 2016-yilda Martin Skorsezening “Vinil” serialida, keyinchalik esa Stiven Soderbergning “Omadli Logan” (“Logan Lucky”) filmida suratga tushgan.
Ammo unga haqiqiy mashhurlik “Yigitlar” (“The Boys”) seriali orqali kelgan, u yerda asosiy personajlardan biri — Hyu Kempbell rolini ijro etgan. Shuningdek, u “O‘rgimchak-odam: O‘rgimchaklar olami bo‘ylab” (“Spider-Man: Across the Spider-Verse”) animatsiyalarida ovoz bergan.
- Mayya Xouk
Uma Turman va Itan Xoukning qizi Maya Rey Turman Xouk disleksiya bilan yashaydi, ya’ni o‘qish va yozishda muammolarga duch keladi. Biroq xastalik uni san’at sohasida rivojlanishdan to‘xtatmagan.
Uning ilk yirik ishi BBC tomonidan suratga olingan “Kichkina ayollar” (“Little Women”) serialidagi Jo March roli bo‘lgan. 2019-yilda esa “Juda g‘alati ishlar” (“Stranger Things”) serialining uchinchi mavsumida Robin Bakli obrazini gavdalantirib, katta muvaffaqiyat qozongan.
2023-yilda Maya bir nechta filmda rol o‘ynagan, jumladan, onasi Uma Turman bilan “Qotillik xonasi” (“The Kill Room”) filmida ishtirok etgan. “Maestro” nomli biografik filmida esa Leonard Bernstaynning qizini ijro etgan.
Bundan tashqari, u musiqiy faoliyat bilan ham shug‘ullanadi. Folklor-rok janrida qo‘shiq kuylaydi va bugungi qadar uchta albom chiqargan.
- Rey Nikolson
Mashhur aktyor Jek Nikolson va aktrisa Rebekka Brusarning o‘g‘li bo‘lgan Rey Nikolson hali ota-onasi kabi katta muvaffaqiyatlarga erishmagan. Biroq uning karyerasida “Umid bag‘ishlovchi qiz” (“Promising Young Woman”), “Lakritsali pitasa” (“Licorice Pizza”) va “Kutilmaganda” (“Out of the blue”) kabi filmlar bor.
2024-yilda u “Tabssum 2” (“Smile 2”) qo‘rqinchli filmida rol o‘ynagan. Rejissyor Parker Finn uni otasiga hurmat ifodasi sifatida taklif qilganini aytgan. Tomoshabinlar esa uning jilmayishini Jek Nikolsonning “Porlash” (“The Shining”) filmidagi ifodasi bilan solishtirgan.
2025-yilda u Jek Kueyd bilan “Novokain” (“Novocaine”) jangovar filmida ishtirok etgan. Shuningdek, 1-may kuni namoyish etiladigan “Psixopat bilan bir kecha” (“Night with a Psycho”) filmida ham asosiy antagonistik rolni ijro etgan.
Izoh (0)