Gollivud aktyori Xyu Grant o‘zining ijtimoiy tarmoqdagi sahifasida “sharmandali va haqoratomuz” deb ta’riflagan voqea tafsilotlari bilan bo‘lishdi. Hodisa Londonning Hitrou aeroportida sodir bo‘ldi, u yerda 63 yoshli aktyor rafiqasi Anna va besh nafar farzandi bilan safardan qaytayotgan edi. Hujjatlarni tekshirish jarayonida migratsiya xizmati xodimlari uni qo‘shimcha tekshiruv uchun to‘xtatishdi.
Aeroport xodimi Grantning farzandlari sobiq turmush o‘rtog‘idan ekani va ularning o‘gay onasi bilan birga xorijga chiqishini shubhali hisoblab, unga bir nechta savollar berdi.
“Hozirgina Hitroudan rafiqam va bolalarim bilan keldik. Hammamizning pasportimizda familiyamiz bir xil — Grant deb yozilgan. Migratsiya xodimi bolalarim bilan suhbatlashgach, ularga shivirlab: bular haqiqatan sizlarning onangiz va otangizmi, deb so‘radi. Ular haddidan oshgan ko‘rinadi, bu men uchun juda haqoratli va qo‘rqinchli ishdir” deb yozdi Xyu Instagram sahifasida.
Ammo qayd etish joizki, migratsiya xodimi o‘z vakolatlari doirasida harakat qilgan va qonunchilikka xilof hech qanday ish qilmagan. Amaldagi qoidalarga ko‘ra, agar bola voyaga yetmagan bo‘lsa va u bilan safarda bo‘lgan kattalar uning ota-onasi emasligi yoki familiyasi boshqacha ekanligi aniqlansa, xodimlar bu kabi savollarni berishga haqlidir. Bu chora bolalarni o‘g‘irlash yoki noqonuniy tarzda chet elga olib chiqilishining oldini olish maqsadida qo‘llaniladi.
Izoh (0)