O‘rtoq Saaxovning shlyapasi, Jek Nikolsonning boltasi: auksionda rekord narxga sotilgan mashhur filmlar rekvizitlari

Har bir shedevr film ortida nafaqat iste’dodli aktyorlar va daho rejissyorlar, balki suratga olish maydonchasidagi rekvizitlar ham turadi. Quyida mashhur kinofilmlardan olingan va katta pulga sotilgan buyumlar bilan tanishing.

O‘rtoq Saaxovning shlyapasi kimoshdi savdosidagi mashhurlik onini 37 yil kutdi

Ko‘pchilik sevib tomosha qiladigan “Kavkaz asirasi” komediyasidagi mashhur “Shlyapani yech!” iborasi esingizdami? Vladimir Etush mahorat bilan ijro etgan o‘rtoq Saaxovning yorqin obraziga xos bo‘lgan bu bosh kiyim kino ekranidan tashqarida ham mashhur bo‘ldi.

2003-yil dekabr oyida Moskvada nafaqaga chiqqan aktyorlar foydasiga xayriya kimoshdi savdosi o‘tkaziladi. Bu tadbirda mazkur shlyapa eng qimmatbaho lotlardan biriga aylanadi. Vladimir Etush 1966-yilda suratga olingan filmning bu rekvizitidan ajralishni istamagan, ammo oxir-oqibat uni sotuvga qo‘yishga qaror qiladi. Shlyapaning boshlang‘ich narxi atigi 50 dollar edi, biroq savdo jarayonida uning narxi 3600 dollargacha ko‘tariladi.

Merilin Monroning oq ko‘ylagi: o‘zgarishlar shamoli esganda

“Yettinchi yil isitmasi” filmidagi Merilin Monroning afsonaviy oq ko‘ylagi nafaqat Gollivud jozibadorligining, balki rekord darajadagi auksion savdolarining ramziga aylandi. 2011-yilda bu mashhur libos aqlbovar qilmas 4,6 million dollarga sotiladi.

Qizig‘i, Merilinning eri, beysbolchi Jo DiMajio bu ko‘ylakni yomon ko‘rar va o‘sha sahnadan g‘oyat g‘azablangan edi. Suratga olishdan uch hafta o‘tgach, gazetalar ularning ajrashgani haqida xabar tarqatadi.

“Titanik”dan olingan eshik: Jekni qutqarolmagan yog‘och panel

“Titanik” filmidagi mashhur yog‘och panel nihoyat yangi egasini topdi. 2024-yilning mart oyida ushbu mashhur rekvizit Heritage Auctions kimoshdi savdosida 718 750 AQSH dollariga sotildi.

Savdo 60 000 dollardan boshlandi, ammo atigi olti daqiqada narx 700 000 dollarga chiqdi. Hamma “eshik” deb ataydigan bu panel, aslida kema salonidagi eshik romining bir qismi ekan. U 1912-yilda cho‘kib ketgan “Titanik”ning haqiqiy parchasi asosida balza yog‘ochidan yasalgan.

“Yog‘du”dagi bolta: muxlislar tungi dahshatli tushlar uchun butun mol-mulkini berishga tayyor

“Yog‘du”dagi eng qo‘rqinchli sahna — Jek Nikolsonning eshikni buzib kirib, “Mana, Jonni ham keldi!” deb qichqirishi bo‘lsa kerak. Stenli Kubrikning mashhur filmidagi o‘sha bolta 2019-yilgi kimoshdi savdosida 209 ming dollarga sotildi.

“Kelajakka qaytib” filmidagi DeLorean: yarim million dollarlik vaqt mashinasi

Yuqoriga qanotsimon ochiladigan eshiklari va zanglamaydigan po‘lat korpusi bilan mashhur bo‘lgan DeLorean DMC-12 avtomobili 2011-yil dekabr oyidagi kimoshdi savdosining chinakam yulduziga aylandi. Marti MakFlay va doktor Emmet Braun sayohat qilgan bu avtomobil 541 200 dollarga sotildi.

Ushbu nusxa trilogiya uchun yaratilgan yettita DeLorean’dan biri bo‘lib, ularning faqat uchtasi suratga olish jarayonidan omon qolgan. Sotilgan avtomobil franshizaning uchinchi qismida, Marti 1885-yilda Dokni qidirish uchun safarga chiqqan sahnada ishlatilgan. Suratga olish ishlari yakunlangach, mashina 14 yil davomida Universal Studios hovlisida qolib ketadi va keyinchalik Los-Anjelesdagi Peterson muzeyida qisqa muddat namoyish etiladi.

Sotuvdan tushgan mablag‘ning bir qismi Maykl J. Foksning Parkinson kasalligini o‘rganish jamg‘armasiga yo‘naltiriladi — Marti rolini ijro etgan aktyor 1991-yildan beri ushbu dardga chalingan.

Odri Hepbernning kichkina qora ko‘ylagi: million dollarlik nafosat timsoli

“Tiffanidagi nonushta” filmidagi Odri Hepbernning mashhur qora libosi 2006-yil dekabrda Christie’s kimoshdi savdosida rekord darajadagi 467 200 funt sterlingga (taxminan 923 187 dollar) sotildi. Hech kim bunday shov-shuvni kutmagandi — dastlabki baho atigi 50-70 ming funt sterlingni tashkil etgandi.

1961-yilda afsonaviy Yuber de Jivanshi tomonidan yaratilgan yengsiz nafis ko‘ylak nozik did ramzi sifatida tan olindi. Filmning mashhur boshlanish sahnasida Xolli Golaytli (Hepbern) erta tongda qo‘lida qahva va kruassan bilan taksidan tushib, bo‘m-bo‘sh Beshinchi shoh ko‘chasiga chiqadi va zargarlik do‘koni vitrinasiga maftun bo‘lib tikilib qoladi.

Kimoshdi savdosi ortidagi ta’sirli voqea shuki, Jivanshi modalar uyi Kalkuttadagi kambag‘al bolalarga yordam beruvchi City of Joy Aid xayriya tashkiloti uchun mablag‘ yig‘ish maqsadida ushbu ko‘ylakni sovg‘a qilgan.

Dorotining yoqut tuflilari: sehrli voqea, o‘g‘rilik va rekord narx

“Oz mamlakati sehrgari” filmidagi Dorotining yaltiroq yoqut tuflilari kimoshdi savdosi dunyosida haqiqiy shov-shuvga sabab bo‘ldi. 2024-yil dekabr oyida ushbu mashhur poyabzalning saqlanib qolgan to‘rt juftidan biri aqlbovar qilmas 28 million AQSH dollariga sotildi.

Bu tuflining tarixi alohida filmga arzigulikdir. 1939-yilda 16 yoshli Judi Garland uchun yaratilgan tuflining har biri 2300 ta yaltiroq munchoq bilan qo‘lda bezatilgan. Qizig‘i shundaki, kitobda tufli kumushrangda tasvirlangan, ammo filmda ular yoqut rangida ko‘rsatilgan. Buning sababi yangi Technicolor rangli formatida sariq g‘ishtli yo‘l fonida yanada chiroyli ko‘rinish berish edi.

2005-yilda mazkur tufli Minnesotadagi Judi Garlend muzeyidan o‘g‘irlangan va 13 yildan keyin 2018-yilda FQB tomonidan topilgan. Ajablanarlisi, o‘g‘ri ularni haqiqiy yoqutlar bilan bezatilgan deb o‘ylagan.

Heritage auksion uyi tuflilarning narxi taxminan 3 million dollar atrofida bo‘lishini taxmin qilgandi, ammo 15 daqiqalik qizg‘in savdodan so‘ng, Dorotini uyga olib borgan sehrli tuflilar kino rekvizitlari orasida mutlaq rekord o‘rnatdi.