Sony, Paramount, Warner Bros. kabi yirik Gollivud studiyalari YouTube platformasidagi soxta film treylerlar bilan kurashishning yangi usulini o‘ylab topdi: ularni mualliflik huquqi buzilgani uchun o‘chirmay, shunchaki qo‘shimcha daromad manbaiga aylantirib oldi.
Deadline nashri olib borgan surishtiruvlarga ko‘ra, kino sanoati mazkur gigantlar endilikda soxta treylerlarni YouTube’da bloklash uchun ariza yubormayapti, balki ularning reklamadan keladigan daromadini o‘zlariga yo‘naltirishni talab qilyapti. Jurnalistlar ko‘rib chiqqan yozishmalardan birida Warner Bros. xuddi shunday talabni Screen Culture kanaliga qo‘ygan hamda U “Ajdaholar uyi” va “Supermen” filmlarining soxta treylerlaridan tushgan monetizatsiya pullarini o‘zlashtirib olgan.
Uchala studiya ham Deadline’ga ushbu masalada izoh berishdan bosh tortmoqda, aktyorlar uyushmasi SAG-AFTRA esa ularning bunday harakatlarini keskin tanqid qilmoqda. Chunki kino sanoati gigantlari mualliflik huquqini himoya qilish o‘rniga feyk videolarni monetizatsiya qilishi ajablanarli holat. Hozircha bunga rasmiy javob berilmasa-da, sabablar aniq: bu pul va bepul reklamadir.
YouTube sayti 2005-yilda, ya’ni, video platforma paydo bo‘lganidan buyon soxta treylerlar bilan to‘lib ketgan. Ulardan eng birinchilaridan biri “Titanik” filmiga asoslangan video bo‘lib, unda Leonardo Di Kaprioning Jek obrazidagi qahramoni okeanda muz bo‘lagi ichida paydo bo‘ladi va Nyu Yorkka qaytadi. Bu kadrlarning bari Selin Dionning “My Heart Will Go On” qo‘shig‘i ostida sodir bo‘ladi. 2018-yilda chiqqan “yangi” treyler “Titanik 2: Jek qaytmoqda” deb nomlanib, 53 milliondan ortiq ko‘rilgan. Ammo video 20th Century Fox talabi bilan bloklangan.
Ushbu videolarni yaratgan foydalanuvchi VJ4rawr2 o‘zining haqiqiy ismini oshkor qilmagan, biroq allaqachon “Konseptual treylerlarning otasi” sifatida tan olingan. U ilk treylerlarni asosan kulgi uchun yaratgan bo‘lsa, so‘nggi yillarda sun’iy intellekt bu jarayonga jiddiy ta’sir o‘tkazmoqda.
Shunga qaramay, hozirgi soxta treylerlarning aksariyati haqiqatdan yiroq formatda, masalan: “Anna Teylor Joy bosh rolidagi ‘Muzyurak’ filmi qanday ko‘rinishda bo‘lar edi?” yoki “Agar Leonardo Di Kaprio ‘Kalmar o‘yini’ filmida rol ijro etganida nima bo‘lar edi?”, “Genri Kevill Jeyms Bond rolida” kabi fake videolar shunchalik mashhurki, ular haqida Variety yoki The Hollywood Reporter kabi nufuzli vebsaytlar maqolalar yozgan.
Deadline ma’lumotlariga ko‘ra, ayrim yirik kanallar soxta treylerlardan millionlab dollar ishlab topmoqda. Yuqorida tilga olingan Screen Culture kanalining egasi 27 yoshli Nihil Chaudxari asosan haqiqatan ham ishlab chiqilayotgan filmlar uchun treylerlar tayyorlashga bilan shug‘ullanadi. U rasmiy videolardan kadrlar, an’anaviy montaj usullari va sun’iy intellekt vositalaridan foydalanib, millionlab tomoshabin e’tiborini tortadigan videolarni ishlab chiqadi.
Bugungi kunda Chaudxari jamoasida 12 ta montajchi ishlaydi va ular har hafta 12 tagacha yangi video chiqaradi. Qizig‘i shundaki, 2025-yil fevral oyida Screen Culture kanalining videosi YouTube’da Marvel tomonidan chiqarilgan rasmiy “Fantastik to‘rtlik” treyleridan ham ko‘proq tomosha qilingan.
Screen Culture kanali 1,4 milliard ko‘rishlar va 1,4 million obunachiga ega, ammo monetizatsiya bo‘yicha da’volar 2700 ta videoning atigi 10 foiziga nisbatan talab qilingan.
Izoh (0)