Tomoshabinlar “Qo‘rg‘on sirlari”ning uchinchi mavsumini sabrsizlik bilan kutgan edi. Bir necha mavsum davomida tomoshabinni syujet burilishlari, keskin dialoglar va murakkab obrazlar bilan o‘ziga rom etgan serialdan kutilgan umidlar juda katta bo‘lgan. Ammo yangi mavsum efirga uzatilishi bilan muxlislar hayratda qoldi: bu avvalgi mavsumlarning davomimi yoki butunlay boshqa hikoyami?
Ssenariy mualliflari go‘yoki ilgari yaratilgan voqealar zanjirini unutib, yangi sahifani ochishga qaror qilgandek. Natijada bir nechta muhim voqealar tushuntirilmasdan o‘tkazib yuborildi, asosiy qahramonlar o‘z xarakterlariga yot harakatlar qila boshladi, vaqt oralig‘idagi uzilishlar esa syujetni yanada chalkashtirib yubordi.
Ushbu maqolada biz “Qo‘rg‘on sirlari”ning 3-mavsumida yo‘l qo‘yilgan eng katta 7 ta ssenariy xatolikni ko‘rib chiqamiz
- Uchinchi mavsumda avvalgi syujet hisobga olinmagan
“Qo‘rg‘on sirlari”ning uchinchi mavsumida sodir bo‘lgan hamma voqealar avvalgi ikki mavsumni xuddi yo‘qqa chiqargandek bo‘ldi. Ikkinchi mavsum yakunida Seyranning hushidan ketishidan oldin aytgan ta’sirli nutqi yodingizdami?
Bu so‘zlar juftini telba kabi sevuvchi, baxti uchun oxirigacha kurashishga tayyor qizning izhorlari edi. Ammo uchinchi mavsumda Seyran butunlay o‘zgacha qiyofada namoyon bo‘ldi. Ferit va Seyran juda mayda ishlar tufayli osonlikcha ajrashib ketishi mantiqqa zid bo‘ldi.
- Ferit va Seyranning farzand kutayotgan davridagi munosabatlari ko‘rsatilmagan
“Qo‘rg‘on sirlari” muxlislari Seyranning homiladorlik davri va Ferit ikkisining samimiy va mehrga to‘la kadrlarini kutishgan edi. Ammo homiladorlik e’lon qilingan sahnadan so‘ng, to‘satdan besh yoshli Duru haqida hikoyalar boshlanib ketadi.
- Suna va Abidin qanday qilib yana topishib olishgani tushuntirilmagan
Birinchi mavsumda ularning munosabatlari beg‘ubor va samimiy sevgi sifatida ko‘rsatildi. Ikkinchi mavsumda ularning yo‘llari turli tomonga ajraladi. So‘ng Suna yonida Kayo paydo bo‘ladi. Biroq kutilmaganda uchinchi mavsumda avvalgi mavsumdagi juftlik yana qaytib qoladi. Ammo bu nima sababdan yuz bergani, bu vaqtda yana qanday voqealar rivoji bo‘lganiga hech qanday izoh berilmadi. Natijada ularning oilaviy hayoti sun’iy va soxta bo‘lib tuyuldi. Bu esa tomoshabinlarda yoqimsiz taassurot qoldirdi. Ayniqsa, Kayoning sirli tarzda yo‘qolib ketishi tushunarsiz chiqqan.
- Antagonist rolidagi Chichek butun serial konsepsiyasini barbod qildi
Dastlabki ikki mavsumda Seyran va Ferit ularning munosabatlariga qarshi odamlar bilan kurashib keldi. Ammo uchinchi mavsumda Abidinning onasi Chichek asosan Xalisga qarshi kurashdi, uning maqsadi Abidinni qaytarib, Korxanlarning boyligini qo‘lga kiritish edi. Seyran va Feritning ajralishi uning asosiy nishoni emasdi. Natijada serialdagi drama kamaydi va reytinglari pasayib ketdi.
- Tarik va Saffetni uchinchi mavsumga juda kech va hech qanday izohsiz kiritishdi
Ikkinchi mavsum oxirida ularni Xalis yo‘q qilib yuborgandek edi. Ammo uchinchi mavsumda qahramonlar yana paydo bo‘ldi. Unda nega Tarik Duruning tug‘ilganiga besh yil o‘tgachgina bolani o‘g‘irlashga qaror qiladi? Shuncha yillar ichida u nimalar bilan band edi? Rejissyorlar bunga serialda hech qanday javob berishmagan.
- Korxanlarning gullab-yashnayotgan biznesi nega birdan muvaffaqiyatsizlikka uchradi?
Korxanlarning zargarlik biznesi nafaqat Turkiyada, balki xorijda ham e’tirof etilgan edi. Biroq uchinchi mavsumda birdan Feritning boshiga moliyaviy tashvishlar tushadi va butun boshli oila ichida aynan u barcha muammolarni hal qilishga majbur bo‘lib qoladi. Avvalgi mavsumda xorijiy investorlar bilan imzolangan shartnomalardan asar ham qolmadi. Natijada tomoshabinlar bunday chalkash syujetli ssenariyni ijobiy qabul qila olmadi.
Izoh (0)