Yangi Zelandiya olimlari 2200-yilga kelib yer yuzidagi sudralib yuruvchilar gigant hajmga yetishini aniqlashdi. Taxmin qilinishicha, ayrim turdagi reptiliyalarning vazni 100 kilogrammdan oshishi mumkin. Hattoki eng mayda sudraluvchilar, masalan, iguanalar ham yirik itlar hajmiga yetishi mumkin. Tadqiqot natijalari Global Ecology and Conservation (GEC) jurnalida chop etilgan.
Olimlarning so‘zlariga ko‘ra, bunday “o‘sish”ning sababi evolyutsion o‘zgarishlardadir. Hozirda aksariyat sudraluvchilarning (masalan, timsohlar va varanlar) tabiiy dushmanlari yo‘q, bu esa ularning tinimsiz kattalashishiga yo‘l bermoqda. Ilgari dinozavrlar davrida sudraluvchilar ancha kichik hajmda bo‘lgan — ularning ko‘pchiligi oddiy kaltakesaklardan deyarli farq qilmagan. Biroq millionlab yillar davomida turlar yiriklasha boshlagan va bugungi hajmiga yetgan.
“Reptiliyalar dinozavr mavjud bo‘lgan davrdan beri barqaror o‘sib kelmoqda. Ularga misol tariqasida kichik kaltakesaklar, timsohlar va toshbaqalarni keltirish mumkin”, deyiladi tadqiqotda.
Ushbu faktni paleontologik topilmalar ham tasdiqlaydi: hozirgi timsohlar va toshbaqalarning ajdodlari vaqt o‘tishi bilan tobora kattalashgan. Sudraluvchilar iqlim qanchalik tez o‘zgargan bo‘lsa, ularning o‘sishi ham tez suratda davom etgan.
Taxmin qilinishicha, 175 yildan keyin yirik varanlarning vazni 70 kilogramm o‘rniga 250 kilogrammgacha yetadi, 5 kilogrammli iguanalar esa katta itlar kattaligiga yetib, 50 kilogrammgacha og‘irlashadi.
Izoh (0)