“Million” kulgi jamoasi 20-oktyabr kuni “Xalqlar do‘stligi” san’at saroyida yangi konsertiga start berdi. Xo‘sh, jamoaning bu yilgi konserti tomoshabinlarga qanday yangiliklarni taqdim etmoqda? Konsert dasturida qaysi dolzarb mavzular tilga olingan? “Daryo” muxbirlari tayyorlagan reportajni tomosha qilib, ushbu savollarga javob olishingiz mumkin.
— Konsertda olib chiqiladigan mavzular ustida butun jamoa ishlaydi. Bir kishining mehnati bilan bo‘ladigan ish emas. Guruhning eng kichik a’zosidan tortib eng kattasi ham birdek mehnat qiladi. Rollar taqsimotida ham shunday, bir sahna ko‘rinishida kamroq rol o‘ynagan yigit yoki qiz keyingisida asosiy rolda chiqishi mumkin. Agar hamma o‘zi yozgan hazilida o‘zi chiqqanida hamma faqat o‘zi uchun sahna ko‘rinishi tayyorlagan bo‘lardi. Lekin barcha chiqishlarga Mo‘min va Ma’ruf qo‘yiladi (kulib), dedi Davron Kabulov.
Million oxirgi yetti yil ichida o‘n kundan kam konsert qo‘ymayapti. Bu biz uchun normal holat, bunga o‘rgandik ham. 2-3 kunlik konsertlarda, menimcha, zerikib qolsak kerak. Konsertning birinchi kunida uch soat sahnada bo‘libmiz. Ikkinchi kunida biroz qisqartirdik — ikki soat-u qirq daqiqa davom etdi. Lekin bu degani birinchi kuni keladiganlar ko‘proq narsa ko‘radi degani emas. Butun boshli sahna ko‘rinishi qisqartirmaymiz — faqat u yer, bu yerini biroz tahrirlaymiz.
Komik aktyor Asqar Hikmatov “Million”ning bu konsertida ilk bor sahnada ko‘rinish beradi, Kelasi konsertlarda Asqar Hikmatovni guruhga qo‘shilish ehtimoli bormi degan savolga Mo‘min Ibrohimov shunday javob berdi:
— Asqar aka bugun sahnada otam rolini ijro etadi. Bu Asqar akaning “Million”ga ko‘rsatayotgan ijodiy yordami. Guruhga qo‘shilish ehtimoli bor, albatta, yo‘q emas. Buni guruhimiz boshi Davron Kabulov hal qiladi.
Asqar Hikmatov:
— Bu yil birinchi marta “Million”chilar bilan sahnaga chiqaman. Menga guruh yigitlari sahna ko‘rinishida qatnashish taklifi bilan chiqdi, bundan juda xursand bo‘ldim. Agar guruhga rasman qo‘shilish taklifi bo‘lsa ham yo‘q demayman.
Ma’ruf Nosirov anchayin jiddiylashgandek ko‘rindi:
— Yoshim 40 ga qarab ketyapti, qariyapman, oldingidek pozitiv emasman. Buyog‘iga og‘ir-vazminroq bo‘lish kerak. Oldin yosh edim, kulib-kulib yurardim. Hayot majbur qiladi, farzandlar katta bo‘lyapti, jiddiy bo‘lish vaqti kelyapti. Sahnada shunday obrazlarda chiqqanim bilan u o‘z nomi bilan sahna, hayot emas.
— Mavzu tanlashda nimalarga ahamiyat beriladi? Bu mavzuni olib chiqsak qanday bo‘larkan, degan o‘y yoki qo‘rquv o‘tadimi hech?
— Bilasizmi, bo‘ridan qo‘rqqan o‘rmonga bormaydi. Hazil qilishda o‘zingizni chegaralashingiz noto‘g‘ri bo‘ladi, dedi jamoa yetakchisi.
— Har konsertda mehmon san’atkor kelib, kechani “qizdirib” berishi an’anaga aylangan. San’atkorlarni taklif qilishda uning trenddaligiga qaraladimi yoki mavqeyiga?
— Ba’zida trendga, ba’zida xonandaning “statusi”ga, ba’zan esa qiladigan hazillarimizga qarab tanlanadi. Avvalgi konsertda Lola chiqdi, u hazillarimizda ham ishtirok etdi. Olti yildan beri Yulduz Usmonova, Farrux Zokirov, Jahongir Otajonov, Tohir Sodiqov, “Setora” guruhi, Ozoda Nursaidova, Lola kabi birinchi raqamli san’atkorlarni dasturimizga taklif qilib kelmoqdamiz. Doim aytaman, bizning muxlislar ham birinchi raqamli muxlislar — ular eng yaxshisiga munosib! Bu safar Shohruh reperni chaqirdik, lekin u bilan hazil uyushtirilmadi. Sababi uning siyosiy faoliyatiga nojo‘ya ta’sir qilib qolishi mumkin, deydi Davron Kabulov.
“Million”ning siri tinimsiz mehnatda, muxlisga ko‘rsatiladigan hazillarga yengil-yelpi qaramasligida! Pishgan non, tabiiyki, mazali chiqadi hamda xaridori ko‘p bo‘ladi. Sahnaga “xom non” olib chiqayotgan guruhlarni ham ko‘ryapmiz, poydevoriga sekin-sekin suv ketib qolyapti. Haqiqiy mehnat bilan chiqadigan bo‘lsak, ko‘p yillar shu sahnada turib muxlislar kulgisi va olqishiga sazovor bo‘lamiz, deb o‘ylayman.
“Cosmos” jamoasida har doimgidek kayfiyat yuqori darajada.
— Konsertga ikki kun davomida kelgan insonlarning aytishiga qaraganda, sizning chiqishingiz anchayin o‘zgaribdi. Muxlislarga yanada yoqyapti. Umuman olganda, ssenariyni faqat o‘z jamoangiz bilan yozasizmi yoki bu jarayonda “Million” yigitlari ham ishtirok etadimi?
— O‘zimiz ham yozamiz, lekin asosiy joylarida baribir ustozlar yordam beradi. Sababi biz faqat bir tomonga qarab ketib qolsak, ular mavzuning boshqa jihatlarini ham qamrab olishimizni eslatib turadi. Tayyorgarlik jarayonini ham bir vaqtda, bir joyda boshlaymiz. Konsert yaqinlashganda esa sahnada bir-birimizning chiqishlarimizni ko‘ramiz, dedi guruh a’zosi O‘tkir Shodmonov.
Konsertda ijtimoiy mavzular, sport sohasi va yana bir qancha mavzulardagi yechilmagan muammo kulgi orqali olib chiqildi. Dastur yakunida Shohruh reper o‘zining eng mashhur qo‘shiqlari bilan sahnani “oyoqqa turg‘azdi”.
Videoreportajni to‘liq holda “Daryo Lifestyle” YouTube kanalida tomosha qiling.
Izoh (0)