Янги Зеландия олимлари 2200 йилга келиб ер юзидаги судралиб юрувчилар гигант ҳажмга етишини аниқлашди. Тахмин қилинишича, айрим турдаги рептилияларнинг вазни 100 килограммдан ошиши мумкин. Ҳаттоки энг майда судралувчилар, масалан, игуаналар ҳам йирик итлар ҳажмига етиши мумкин. Тадқиқот натижалари Global Ecology and Conservation (GEC) журналида чоп этилган.
Олимларнинг сўзларига кўра, бундай “ўсиш”нинг сабаби эволюцион ўзгаришлардадир. Ҳозирда аксарият судралувчиларнинг (масалан, тимсоҳлар ва варанлар) табиий душманлари йўқ, бу эса уларнинг тинимсиз катталашишига йўл бермоқда. Илгари динозаврлар даврида судралувчилар анча кичик ҳажмда бўлган — уларнинг кўпчилиги оддий калтакесаклардан деярли фарқ қилмаган. Бироқ миллионлаб йиллар давомида турлар йириклаша бошлаган ва бугунги ҳажмига етган.
“Рептилиялар динозавр мавжуд бўлган даврдан бери барқарор ўсиб келмоқда. Уларга мисол тариқасида кичик калтакесаклар, тимсоҳлар ва тошбақаларни келтириш мумкин”, дейилади тадқиқотда.
Ушбу фактни палеонтологик топилмалар ҳам тасдиқлайди: ҳозирги тимсоҳлар ва тошбақаларнинг аждодлари вақт ўтиши билан тобора катталашган. Судралувчилар иқлим қанчалик тез ўзгарган бўлса, уларнинг ўсиши ҳам тез суратда давом этган.
Тахмин қилинишича, 175 йилдан кейин йирик варанларнинг вазни 70 килограмм ўрнига 250 килограммгача етади, 5 килограммли игуаналар эса катта итлар катталигига етиб, 50 килограммгача оғирлашади.
Изоҳ (0)