Idish-tovoq yuvish uchun mo‘ljallangan gel ko‘pchilik bekalar foydalanadigan eng qulay va universal vosita hisoblanadi. Biroq uydagi hamma narsani ham bunday vosita bilan yuvib bo‘lmaydi. Aks holda ba’zi buyumlar asl ko‘rinishini yo‘qotadi yoki umuman yaroqsiz holga kelib qoladi.
1. Yog‘ochdan yasalgan buyumlar
Yog‘ochdan ishlangan mebel, idishlar yoki pol qoplamalari idish yuvish geli bilan tozalash uchun mos kelmaydi. Bunday buyumlar odatda maxsus yog‘ yoki lak bilan qoplangan bo‘ladi. Gel esa bu himoya qatlamini eritib yuboradi va natijada yog‘och qurib, yoriladi yoki rangi oqarib, ko‘rimsiz holga keladi. Bu esa mebelning xizmat qilish muddatini qisqartiradi. Yog‘och yuzalarni tozalash uchun aynan shunga mo‘ljallangan yoki tabiiy tarkibga ega vositalardan foydalanish tavsiya etiladi.
2. Cho‘yan idish-tovoqlar
Cho‘yandan yasalgan tova va qozonlar har doim alohida parvarish talab qiladi. Bu turdagi idishlar qisqa muddatda yog‘li qatlam bilan qoplanadi, bu qatlam ularni zanglab ketishdan himoya qiladi. Agar ularni gel bilan yuvsangiz, bu himoya qatlami yuvilib ketadi va cho‘yan sirtida korroziya paydo bo‘ladi. Bunday idishlarni yuvishda oddiy qaynoq suv, bir oz soda (tuz) va cho‘tka yetarli.
3. Qahva tayyorlash qurilmasi (kofemashina)
Kofevarka yoki espresso-mashina kabi qurilmalarning ichki qismlari nozik bo‘ladi. Shuning uchun ularni har qanday vosita bilan yuvish mumkin emas. Gel tarkibidagi kimyoviy moddalar mexanizmga zarar yetkazishi yoki qoldiqlari ichimlikka o‘tib, ta’miga ta’sir qilishi mumkin. Shu sababli bunday texnikalarni faqat ishlab chiqaruvchi tomonidan tavsiya etilgan vositalar bilan tozalash lozim.
4. Ipak matodan tikilgan buyumlar
Ipak juda nozik mato bo‘lib, unga alohida parvarish zarur. Ko‘ylak, kofta, yostiq jildi yoki choyshab bo‘ladimi — barchasi ehtiyotkorlik bilan yuvilishi kerak. Gel tarkibidagi faol moddalar ipak tolalarini zaiflashtirib, matoni buzib qo‘yishi mumkin. Agar ipak kiyimda dog‘ paydo bo‘lgan bo‘lsa, uni maxsus nozik matolar uchun ishlab chiqilgan vosita bilan tozalagan afzal.
5. Charmdan ishlangan mebel yoki kiyimlar
Charm sirtiga gel bilan ishlov berish mutlaqo mumkin emas. Tabiiy matodan tayyorlangan divan, charm kurtka yoki sumka kabilarning ko‘rinishi gel ta’sirida o‘zgarib ketadi — yaltirashi yo‘qoladi, sirtida dog‘lar paydo bo‘ladi, hatto qurib, yorilib ketadi. Bunday holatlarning oldini olish uchun charm uchun mo‘ljallangan tabiiy vosita tayyorlash mumkin. Buning uchun oddiy ichimlik suvi bilan iste’mol sirkasini teng miqdorda aralashtirib, yengil harakat bilan artish kifoya.
Izoh (0)