AQSH Hukumat samaradorligini oshirish departamenti (DOGE) ma’lum vaqtdan so‘ng o‘z faoliyatini to‘xtatadi, chunki tadbirkor va Tesla kompaniyasi asoschisi Ilon Mask davlat xizmatida atigi 130 kun ishlaydi. Bu haqda AQSH prezidenti Donald Tramp ma’lum qildi.
Uning aytishicha, u Maskni iloji boricha uzoqroq ushlab turishga harakat qiladi.
AQSH prezidenti, shuningdek, Maskni iste’dodli shaxs deb ta’riflab, u o‘z vazifasini a’lo darajada bajarayotganini, biroq tadbirkor yirik kompaniyadagi biznesini boshqarishga qaytishi kerakligini ta’kidladi.
“U juda iste’dodli yigit. Bilasizmi, men juda aqlli odamlarni yaxshi ko‘raman va u haqiqatan ham aqlli, u ajoyib ish qildi. Qachondir Ilon o‘z kompaniyasiga qaytishni istaydi”, deya izoh berdi Tramp.
Mask ketganidan keyin DOGE’ning kelajagi haqidagi savolga javob berar ekan, u federal idoralar rahbarlari allaqachon “ko‘p narsani o‘rganib olganini” va ularning ba’zilari DOGE xodimlarini saqlab qolishni xohlashlarini aytgan. AQSH rahbarining fikricha, “ma’lum bir paytda” idoraning faoliyati yakunlanadi.
Mask AQSHning davlat xarajatlarini 2 trillion dollarga qisqartirish rejalarini e’lon qilgan edi. Amerikaning Inc. biznes jurnali mart oyi oxirida DOGE’ning o‘z ma’lumotlariga ko‘ra, davlat 130 milliard dollar tejab qolgani haqida yozgan. Ekspertlar bu raqamning noaniq ekanligini ta’kidlashmoqda. Nashrning qayd etishicha, soliq tushumlarining yo‘qotilishi tufayli DOGE faoliyati milliardlab dollarga tushishi mumkin.
Izoh (0)