AQSH prezidenti Donald Tramp Vladimir Zelenskiy bilan Oq uyda uchrashgani, uchrashuv tarang vaziyatda yakunlangani haqida xabar berilgandi.
Ukraina rahbari Kiyev o‘t ochishni to‘xtatishga tayyor emasligi va Vashingtondan xavfsizlik kafolatiga muhtoj ekanini aytganidan keyin vaziyat taranglashgan. Tramp bunga javoban shunday dedi:
Siz bizga men buni xohlayman, buni xohlamayman, deb ayta olmaysiz. Bizsiz qo‘lingizda kartalar yo‘q, bizdan minnatdor bo‘lishingiz kerak. Biz sizga 350 milliard dollar berdik, siz hozir qiyin ahvoldasiz. Men urushni to‘xtatmoqchi emasman, deya olmaysiz. Yo biz bu bitimni tuzamiz yoki siz undan chiqib ketasiz. Siz minnatdorlik ko‘rsatmayapsiz.
Zelenskiy Oq uyni asabiy qiyofada tark etayotgani aks etgan videolar tarqaldi.
Zelenskiy va Trampning Oq uydagi munozarasiga dunyodagi siyosatchilar turlicha munosabat bildirdi. Yevropaning bir qator rahbarlari Ukrainani qo‘llab-quvvatlagan bo‘lsa, amerikalik siyosatchilar Trampning harakatlarini yoqlagan.
Quyida Zelenskiy va Tramp uchrashuviga siyosatchilar munosabatlari keltirilgan.
AQSH Hukumat samaradorligi departamenti (DOGE) rahbari Mask: “Zelenskiy Amerika xalqi nazarida o‘zini yo‘q qildi”.
AQSH moliya vaziri Bessent: “Prezident Tramp, jahon sahnasida Amerika xalqi va mamlakatimizni himoya qilganingiz uchun tashakkur”.
Rossiya Xavfsizlik kengashi raisi o‘rinbosari Dmitriy Medvedev: “Oval kabinetda shiddatli bahs. Tramp kokain masxaraboziga birinchi marta yuziga haqiqatni aytdi: Kiyev rejimi uchinchi jahon urushi bilan o‘ynashmoqda. Va noshukur cho‘chqa cho‘chqaxona egalaridan qattiq tarsaki oldi. Bu foydali. Ammo bu yetarli emas — biz natsistlar mashinasiga harbiy yordamni to‘xtatishimiz kerak”.
Ukraina prezidenti devoni rahbari Andrey Yermak: “Prezident mamlakatimiz uchun, adolatli va mustahkam tinchlikni himoya qilayotgan har bir inson uchun kurashmoqda. Men qahramon xalqimiz manfaatlarini himoya qilayotgan prezidentimizni qo‘llab-quvvatlayman. Har qanday vaziyatda. Nuqta. Atrofdagilardan minnatdormiz”.
Polsha bosh vaziri Donald Tusk: “Hurmatli Zelenskiy, aziz ukrainalik do‘stlar, siz yolg‘iz emassiz”.
Ispaniya bosh vaziri Pedro Sanches: “Ukraina, Ispaniya siz bilan”.
Fransiya prezidenti Emmanuel Makron: “Agressor bor — bu Rossiya, qurbon bor — bu Ukraina. Biz yordam bergan barchaga minnatdorchilik bildirishimiz va boshidan kurashib kelayotganlarni hurmat qilishimiz kerak”.
Moldova prezidenti Maya Sandu: “Haqiqat oddiy. Rossiya Ukrainaga hujum qildi. Rossiya agressor. Ukraina o‘z va bizning erkinligimizni himoya qiladi. Biz Ukraina bilanmiz”.
“Ukraina — bu Yevropa! Biz Ukraina bilan birgamiz. Biz Ukraina tajovuzkorga qarshi kurashishda davom etishi uchun uni qo‘llab-quvvatlashimizni kuchaytiramiz”, deb yozdi Yevropa ittifoqining tashqi siyosat bo‘yicha rahbari Kaja Kallas ijtimoiy tarmoqda.
“Bugun erkin dunyoga yangi rahbar kerakligi ma’lum bo‘ldi. Biz, yevropaliklar, bu muammoni hal qilishimiz kerak”, deya qo‘shmcha qildi u.
Kanada, Chexiya, Latviya va Litva ham Zelenskiyni qo‘llab-quvvatlovchi bayonotlar berdi.
Izoh (0)