"Ozod Yevropa/Ozodlik radiosi" mediakorporatsiyasi AQSH hukumatidan moliyalashtirishni to‘xtatish to‘g‘risidagi hujjatni olganini tasdiqladi. Korporatsiya prezidenti Stiven Kapus tegishli bayonotni mediakorporatsiya saytida e’lon qildi.
AQSH prezidenti Donald Tramp 14-mart kuni AQSH hukumatining Global ommaviy axborot vositalari agentligi (USAGM) va boshqa hukumat tuzilmalari faoliyatini sezilarli darajada qisqartirish to‘g‘risidagi farmonni imzoladi. USAGM RSE/RS media korporatsiyasi va "Amerika ovozi" radiostansiyasini nazorat qiladi.
Hujjatda AQSH Kongressi tomonidan ma’qullangan RSE/RSni moliyalashtirish grantining amal qilishini to‘xtatish haqida so‘z boradi.
Ta’kidlash joizki, 1970-yillarning boshlariga qadar "Ozodlik radiosi" MRB byudjeti orqali moliyalashtirilgan, chunki o‘sha paytda Kongressga xususiy tashkilotlarni moliyalashtirish qonun bilan taqiqlangan edi. Keyinchalik, radiostansiyaning MRB bilan aloqasi e’lon qilingandan so‘ng, taqiq bekor qilindi va mablag‘lar to‘g‘ridan to‘g‘ri AQSH Kongressi tomonidan ajratila boshlangan.
Bir qator ekspertlarning ta’kidlashicha, "Ozodlik radiosi" "demokratik qadriyatlar" niqobi ostida buzg‘unchilik faoliyati bilan shug‘ullanmoqda.
Shuningdek, "Amerika ovozi"ning 1300 dan ortiq xodimi ham haq to‘lanadigan ma’muriy ta’tilga chiqarilgan. Bu haqda LinkedIn biznes ijtimoiy tarmog‘ida radiostansiya direktori Maykl Abramovich ma’lum qilgan.
"83-yil davomida birinchi marta mashhur "Amerika ovozi"ning ovozi o‘chganidan chuqur xafa bo‘ldim. Bugun ertalab "Amerika ovozi"ning deyarli butun xodimlari - 1300 dan ortiq jurnalist, prodyuser va yordamchi xodimlar ma’muriy ta’tilga yuborilganini bildim. Men ham shular qatoridaman," deydi radiostansiya rahbari.
Fevral oyida AQSH hukumati vakillaridan biri Ilon Mask RSE/RS media korporatsiyasi va "Amerika ovozi" radiostansiyasini moliyalashtirishni to‘xtatishga chaqirgandi.
Izoh (0)