AQSH Sog‘liqni saqlash vazirligi va ijtimoiy xizmatlarning barcha xodimlari pul kompensatsiyasi evaziga ishdan bo‘shash taklifini oldi. Bu haqda manbalarga tayanib, CBS News xabar berdi.
Vazirlikning barcha xodimlari 25 ming dollar miqdoridagi “ixtiyoriy ishdan bo‘shash uchun rag‘batlantiruvchi nafaqa” evaziga iste’foga chiqish imkoniyati haqida xabarnoma olgan. Qarorni 14-martgacha qabul qilish kerak.
Tramp ma’muriyatining federal ishchi kuchini qisqartirish va hukumat byudjetini ommaviy ishdan bo‘shatishlar hamda moliyaviy qisqartirishlar orqali kamaytirish bo‘yicha sa’y-harakatlarining bir qismidir. Bu jarayon asosan milliarder Ilon Mask boshchiligidagi Oq uyning hukumat samaradorligi departamenti yoki DOGE orqali amalga oshirildi, deyiladi xabarda.
Ta’kidlanishicha, yanvar oyidan beri AQSHda federal agentliklarning 62 mingdan ortiq xodimi ishsiz qolgan. Bu 2020-yil iyul oyidan beri ishdan bo‘shatishning eng yuqori ko‘rsatkichidir.
AQSH Sog‘liqni saqlash va ijtimoiy xizmatlar vazirligida 80 mingdan ortiq xodim ishlaydi, u oziq-ovqat va dori-darmonlarni nazorat qilish boshqarmasi, AQSH kasalliklarni nazorat qilish va oldini olish markazlari, Milliy sog‘liqni saqlash institutlari, Medicare va Medicaid xizmatlari markazlari kabi bir qancha yirik sog‘liqni saqlash muassasalari faoliyatini nazorat qiladi.
Sog‘liqni saqlash vazirligida sinov muddatida bo‘lgan minglab xodimlar o‘tgan oyda ishdan bo‘shatilishi haqida xabardor qilingan, deya ta’kidlaydi CBS News.
Xodimlarning ommaviy ishdan bo‘shatilishi Sog‘liqni saqlash vazirligi ishiga qanday ta’sir qilishi hozircha noma’lum. Mamlakat yaqinda parranda grippi va qizamiq epidemiyasiga duch keldi.
Avvalroq Tramp vazirlarni chaqirib, kadrlar siyosati masalalarida DOGE rahbari Ilon Mask emas, federal agentliklar rahbarlari hal qiluvchi rol o‘ynashini aytgan edi. Uning so‘zlariga ko‘ra, Mask faqat idoralar rahbarlariga kadrlar masalasida tavsiyalar berishi mumkin, yakuniy qarorlar esa ularning o‘zida qoladi. Shu bilan birga, bu uchrashuvda Ilon Maskning o‘zi ham ishtirok etgan va xatosini tan olgan.
Izoh (0)