Rossiyada mamlakat bo‘yicha eng mashhur ikki messenjer - Telegram va WhatsApp orqali qo‘ng‘iroqlarga qisman cheklovlar joriy etildi. Bu haqda “Roskomnadzor” matbuot xizmati xabar qildi.
Ma’lum qilinishicha, ushbu chora firibgarlik, pul undirish, qo‘poruvchilik va terrorchilik faoliyatiga jalb qilish uchun bu ilovalardan foydalanadigan jinoyatchilarga qarshi kurashish maqsadida qabul qilingan.
Idoraning aniqlik kiritishicha, cheklovlar faqat qo‘ng‘iroqlar funksiyasiga taalluqli bo‘lib, ilovalarning qolgan funksiyalari o‘zgarishsiz qoladi.
Davlat Dumasining axborot siyosati bo‘yicha qo‘mitasi a’zosi Anton Nemkinning ta’kidlashicha, qo‘ng‘iroqlarni bloklash fuqarolarni telefon va internet firibgarliklaridan himoya qilish uchun zarur. Uning so‘zlariga ko‘ra, Telegram va WhatsApp jinoyatchilar rossiyaliklarni aldaydigan asosiy platformalardir.
Biroq, Rossiya Markaziy bankining 2025-yil fevralda e’lon qilingan 2024-yilgi so‘roviga ko‘ra, firibgarlar ma’lumotlar va pullarni o‘g‘irlash uchun messenjerlardan (15,7 foiz holatlarda) ko‘ra uyali aloqa va SMS xabarlardan (45,6 foiz holatlarda) uch baravar ko‘proq foydalanadilar. Shunday bo‘lsa-da, Roskomnadzor asosiy e’tiborni aynan messenjerlardagi qo‘ng‘iroqlarni cheklashga qaratgan.
Cheklovlarga javoban Telegram o‘z platformasidagi zararli faoliyat, jumladan, firibgarlik va zo‘ravonlikka chaqiriqlarga qarshi faol kurashayotganini ma’lum qildi.
“Telegram birinchi bo‘lib qo‘ng‘iroqlar uchun batafsil maxfiylik sozlamalarini joriy etdi, shunda har bir foydalanuvchi kimdan qo‘ng‘iroqlarni qabul qilish yoki ularni butunlay o‘chirishni mustaqil ravishda belgilashi mumkin”, deyiladi messenjer xabarida.
Shuningdek, Telegramda moderatorlar sun’iy intellekt vositalaridan foydalanib, har kuni millionlab zararli xabarlarni aniqlashi va o‘chirishi haqida xabar berildi.
Iyun oyi oxirida Rossiya prezidenti Vladimir Putin davlat xizmatlari portali bilan integratsiyalashgan markazlashtirilgan xizmat - MAX messenjerini yaratish to‘g‘risidagi qonunni imzoladi.
O‘sha oyda Davlat Dumasi yakuniy o‘qishda internetda ekstremistik materiallarni qasddan qidirish va ularga kirish, shu jumladan VPN’dan foydalanganlik uchun jarimalar to‘g‘risidagi qonunni qabul qildi. Huquqbuzarlar 3-5 ming rubl miqdorida ma’muriy jarimaga tortilishi mumkin. Bundan tashqari, VPN’dan foydalanish endi jinoyat sodir etishda og‘irlashtiruvchi holat hisoblanadi.
Izoh (0)