AQSH sudi prezident Donald Tramp ma’muriyatiga ikki kun ichida AQSH Xalqaro taraqqiyot agentligi (USAID) liniyasi bo‘ylab xorijiy yordamni tiklash majburiyatini yukladi. Bu haqda Associated Press xabar berdi.
Hukm USAID’ning barcha dasturlarini moliyalashtirishni to‘xtatishga qarshi da’vo bo‘yicha Kolumbiya okrugi sudida bo‘lib o‘tgan eshituv natijalariga ko‘ra chiqarildi. Okrug sudyasi Amir Alining aytishicha, rasmiylar blokdan chiqarish to‘g‘risidagi avvalgi qarorni bajarmagan.
Sudga shikoyat notijorat tashkilotlari tomonidan kiritilgan. Ular USAID va davlat departamenti orqali xorijga ko‘rsatiladigan yordamning to‘xtatilishini tanqid qilmoqda. Tramp 20-yanvar kuni o‘z lavozimiga kirishganidan so‘ng darhol boshqa mamlakatlarga rivojlanish uchun yordam ko‘rsatishni 90 kunga to‘xtatish to‘g‘risidagi farmonni imzoladi. U shu tariqa “samarasiz” deb baholagan xorijiy dasturlarni to‘xtatib qo‘ydi.
Xorijda ishlovchi nodavlat tashkilotlari va federal mablag‘ oladigan bizneslar bu federal qonunni buzishini va zaruriy hayotiy yordam ko‘rsatishni cheklaganini ta’kidladi.
USAID va davlat departamenti hamkorlariga ko‘ra, ma’muriyat ularga to‘lanishi kerak bo‘lgan yuzlab million dollarni bermayapti, bu esa o‘n minglab xodimlarni ishdan bo‘shatishga va ba’zi tashkilotlarni moliyaviy falokatga olib kelmoqda.
Davlat kotibi Marko Rubio fevral oyi oxirida davlat departamenti va USAID tomonidan moliyalashtiriladigan AQSHning barcha xorijiy yordamini to‘xtatdi. Hukumatning Samaradorlik departamenti (DOGE) rahbari Ilon Mask USAID menejerlari bilan bog‘liq muammolar tufayli xodimlar “ma’muriy ta’tilga chiqarilganini” aytgan edi.
USAID haqida
Tashkilot 1961-yilda AQSH prezidenti Jon Kennedining xorijiy mamlakatlarga yordam ko‘rsatish to‘g‘risidagi qonuni qabul qilinganidan so‘ng ijro farmoni bilan tashkil etilgan. Agentlik AQSHning xalqaro rivojlanish masalalari bilan shug‘ullangan bir nechta avvalgi idoralarining vazifalarini o‘zida mujassamlashtirdi. USAID 1998-yildan beri mustaqil agentlik maqomiga ega.
USAID’ning umumiy siyosiy rahbarligini AQSH davlat kotibi amalga oshiradi, shuningdek, agentlik prezident va Milliy xavfsizlik kengashiga bo‘ysunadi. Direktor va uning ikki o‘rinbosarini AQSH prezidenti kongress roziligini olib tayinlaydi.
Tashkilotning byudjeti 50 milliard dollardan oshgan. Bugungi kunda uning tarkibida 10 mingdan ortiq xodim ishlaydi, ularning uchdan ikki qismi Qo‘shma Shtatlardan tashqarida faoliyat yuritadi. Tashkilot tarkibiga bir nechta mintaqaviy va ixtisoslashgan byurolar kiradi.
Izoh (0)