Italiya janubidagi Lampedusa oroli yaqinida 13-avgust kuni 2 ta kema cho‘kib ketishi oqibatida kamida 26 nafar qochqin va muhojir halok bo‘ldi. BMT agentliklari qidiruv ishlari davom etayotganini va bedarak yo‘qolganlar soni ortishi mumkinligini bildirmoqda. Bu haqda Al Jazeera xabar berdi.
Italiya Qizil xoch tashkiloti va BMT Qochqinlar bo‘yicha oliy komissarligi (UNHCR) ma’lumotiga ko‘ra, qutqaruvchilar 60 kishini suvdan olib chiqqan. Ularning 56 nafari erkak, 4 nafari ayol. BMTning Xalqaro migratsiya tashkiloti vakili Flavio Di Djakomo 2 ta kemada jami 95 kishi bo‘lganini bildirgan. Qutqarilganlar sonidan kelib chiqib, taxminan 35 kishi bedarak yo‘qolgan yoki halok bo‘lgani taxmin qilinmoqda.
Reuters’ning xabar berishicha, Italiya huquq-tartibot idoralariga qarashli samolyot Lampedusadan 23 km uzoqlikda ag‘darilgan kemani va suvda suzib yurgan jasadlarni aniqlagach, qutqaruv ishlari boshlangan. Voqeaga guvohlar muhojirlar Tripoli (Liviya poytaxti)dan ertalab 2 ta kemada yo‘lga chiqqanini aytmoqda. Qayiqlardan biri suvga to‘la boshlagach, yo‘lovchilar ikkinchi kemaga o‘tgan, biroq u ham to‘lqinli dengizda ag‘darilib ketgan.
Italiya Qizil xoch tashkiloti vakili Kristina Palma omon qolganlarning ahvoli “qoniqarli” ekanini, biroq 4 kishi kasalxonaga yotqizilganini bildirgan. Italiya bosh vaziri Jorjiya Meloni boshchiligidagi hukumat Afrika qirg‘oqlaridan boshlanadigan noqonuniy dengiz yo‘llarini to‘sishga va odam savdosiga qarshi qattiq choralar ko‘rishga va’da bermoqda.
Yuqoridagi hodisa Liviya hududidan Yevropaga xavfli O‘rta Yer dengizi orqali yo‘l olgan muhojirlar ishtirokidagi navbatdagi fojea bo‘ldi. BMT va huquq tashkilotlari Liviyada qochqin va muhojirlarga nisbatan qiynoq, zo‘rlash va tovlamachilik kabi muntazam zo‘ravonliklar qayd etilayotganini ta’kidlamoqda. Xususan, fevral oyida Liviya cho‘llaridan birida qariyb 50 ga yaqin jasad topilgandi. UNHCR’ning Italiyadagi vakili Filippо Ungaro yil boshidan beri O‘rta Yer dengizida 675 kishi halok bo‘lganini ma’lum qilgan.
Izoh (0)