АҚШ Ҳукумат самарадорлигини ошириш департаменти (DOGE) маълум вақтдан сўнг ўз фаолиятини тўхтатади, чунки тадбиркор ва Tesla компанияси асосчиси Илон Маск давлат хизматида атиги 130 кун ишлайди. Бу ҳақда АҚШ президенти Дональд Трамп маълум қилди.
Унинг айтишича, у Маскни иложи борича узоқроқ ушлаб туришга ҳаракат қилади.
АҚШ президенти, шунингдек, Маскни истеъдодли шахс деб таърифлаб, у ўз вазифасини аъло даражада бажараётганини, бироқ тадбиркор йирик компаниядаги бизнесини бошқаришга қайтиши кераклигини таъкидлади.
“У жуда истеъдодли йигит. Биласизми, мен жуда ақлли одамларни яхши кўраман ва у ҳақиқатан ҳам ақлли, у ажойиб иш қилди. Қачондир Илон ўз компаниясига қайтишни истайди”, дея изоҳ берди Трамп.
Маск кетганидан кейин DOGE’нинг келажаги ҳақидаги саволга жавоб берар экан, у федерал идоралар раҳбарлари аллақачон “кўп нарсани ўрганиб олганини” ва уларнинг баъзилари DOGE ходимларини сақлаб қолишни хоҳлашларини айтган. АҚШ раҳбарининг фикрича, “маълум бир пайтда” идоранинг фаолияти якунланади.
Маск АҚШнинг давлат харажатларини 2 триллион долларга қисқартириш режаларини эълон қилган эди. Американинг Инc. бизнес журнали март ойи охирида DOGE’нинг ўз маълумотларига кўра, давлат 130 миллиард доллар тежаб қолгани ҳақида ёзган. Экспертлар бу рақамнинг ноаниқ эканлигини таъкидлашмоқда. Нашрнинг қайд этишича, солиқ тушумларининг йўқотилиши туфайли DOGE фаолияти миллиардлаб долларга тушиши мумкин.
Изоҳ (0)