AQSH prezidenti Donald Tramp 6-mart kuni Hukumat samaradorligi departamenti (DOGE) rahbari Ilon Maskning faoliyatiga yangi cheklovlar qo‘ydi. Bu haqda Politico xabar berdi.
DOGE rahbari bunga javoban boshqaruvda ayrim xatolarga yo‘l qo‘yganini tan oldi. Ikki nafar vakilning aytishicha, Tramp o‘z ma’muriyatining yuqori lavozimdagi a’zolariga Mask faqat tavsiyalar berish huquqiga egaligini aytgan. Ammo uning kadrlar va siyosat masalada yakka tartibda qarorlar qabul qilish huquqi yo‘qligini ta’kidlagan.
Bu Trampning Mask vakolatlarini cheklash yo‘lidagi birinchi jiddiy qadami hisoblanadi. Prezidentning yangi ko‘rsatmalariga ko‘ra, Mask va uning xodimlari maslahatchi vazifasini bajaradi. Ammo kadrlar, siyosat va amalga oshirish sur’atlari bo‘yicha yakuniy qarorlarni Vazirlar Mahkamasi a’zolari qabul qilishi lozim.
Milliarder bu borada prezidentning bayonotiga qo‘shilib, ayrim xatolarga yo‘l qo‘yganini tan oldi. Ushbu xatolar ommaviy ishdan bo‘shatishlar va davlat xizmatchilariga tahdidlar bilan bog‘liq.
Trampning aytishicha, u hukumatda professional mutaxassislarni saqlab qolishni va qobiliyatli federal ishchilarni ommaviy ravishda haydamaslikni xohlaydi. Ammo uning ma’muriyati so‘nggi haftalarda o‘n minglab federal xodimlarni ishdan bo‘shatdi. Prezidentning yangi qarori bo‘shatilgan ishchilarning qayta ishga olinishiga olib keladimi yoki yo‘qmi, aniq emas.
Kotibalar turli bo‘limlarda ishlaydigan odamlarni o‘rganib, tushunib borar ekan, kimni qoldirish va ketqazishni juda aniq biladi. Ilon va boshqa buyuk insonlar esa tarixiy darajadagi ishlarni amalga oshirisi mumkin, deya izoh berdi Tramp.
Prezident jamoasi tomonidan byudjetni tejash maqsadida hukumat agentliklari xodimlarining ommaviy qisqartirilishi Markaziy razvedka boshqarmasi va Mudofaa vazirligiga ham ta’sir ko‘rsatdi. Pentagonning ta’kidlashicha, sinov muddatida bo‘lgan va o‘z lavozimida bir yil yoki undan kam ishlagan besh mingdan ortiq xodim ishdan bo‘shatilishi mumkin. Markaziy razvedka boshqarmasi allaqachon inklyuzivlik siyosati (DEI) bilan bog‘liq bo‘lgan 20 dan ortiq xodimlarni ishdan olgan.
Ishdan bo‘shatish to‘lqini butun mamlakat bo‘ylab davom etmoqda. Avvalroq Associated Press yuz minglab odamlar ishsiz qolishi mumkinligi, ayniqsa, bu 1-2 yildan kam ishlagan va sinov muddatida bo‘lganlarga tegishli ekani haqida xabar bergan edi. Ishdan bo‘shatish to‘g‘risidagi xatlar, xususan, elektron pochta orqali yuboriladi.
2025-yil fevral oyida Tramp ma’muriyati yadroviy xavfsizlik boshqarmasining 400 nafargacha xodimini tasodifan ishdan bo‘shatgani ma’lum bo‘lgandi. Ular orasida yadro quroli ishlab chiqarish obyektlarida ishlagan, pudratchilarni nazorat qilgan va qurollarni tekshirgan mutaxassislar ham bor. Endi ularni shoshilinch ravishda qaytarishga urinishmoqda.
Izoh (0)