Ikki gumonlanuvchi Isroil bosh vaziri Binyamin Netanyahu idorasining Qatar vakillari bilan aloqasi borligi haqidagi “Qatargeyt” ishi doirasida so‘roq qilish uchun hibsga olingan. Bu haqda Politsiya matbuot xizmati dushanba kuni shunday ma’lumot berganini KAN agentligi xabar qildi.
Bayonotda hibsga olinganlarning ismlari ko‘rsatilmagan, biroq Isroil televideniyesining 12-kanali ma’lum qilishicha, huquq-tartibot organlari Netanyahuning katta maslahatchisi Yonatan Urix va Netanyahuning sobiq matbuot kotibi Eli Feldshteynni ushlagan.
Telekanalning ta’kidlashicha, hibsga olinganlar politsiyaga pulni kim berganini va haqiqatan ham Qatar uchun ishlaganini yoki ishlamaganini aytib berishlari kerak bo‘ladi.
Tergovni “Laxav 433” jinoyatchilikka qarshi kurashish bo‘yicha milliy politsiya bo‘linmasi va Umumiy xavfsizlik xizmati (SHABAK) olib bormoqda.
Ilgari SHABAK Isroil bosh vaziri idorasi xodimlari va Qatar amaldorlari o‘rtasidagi ehtimoliy aloqalarni tekshirish bilan shug‘ullangan edi.
Times of Israel nashrining yozishicha, Isroil bosh prokurori Gali Baharav-Miara avvalroq Isroil mudofaa kuchlarining (SAHAL) maxfiy hujjatlarini oshkor qilishda ayblangan Netanyahuning sobiq matbuot kotibi Eli Feldshteyn Doha yollagan xalqaro firma orqali arab davlati uchun ishlagani va isroillik jurnalistlarni Qatar tarafdori materiallar bilan ta’minlagani ma’lum bo‘lgach, ushbu tekshiruvni o‘tkazishni buyurgan.
O‘tgan yilning noyabr oyida Netanyahuning yordamchilari Urix va Isroil Aynxorn 2022-yilgi jahon chempionati arafasida Qatarda jamoatchilik bilan aloqalarni yo‘lga qo‘ygani haqida ham xabar berilgan edi.
Isroilda bosh vazir Binyamin Netanyahu idorasi va Qatar vakillari o‘rtasidagi aloqadorlik bo‘yicha tergov tafsilotlarini oshkor qilishga sud tomonidan taqiq qo‘yilgan.
Izoh (0)