G‘azo sektoridagi minglab falastinliklar urushni tugatish talabi bilan HAMASga qarshi namoyishga chiqdi. Bu haqda Associated Press xabar berdi.
Falastinliklar G‘azo shimolidagi shahar vayronalari orasida yurish qilgan. Ular Isroil bilan 17 oylik jangni to‘xtatishga va guruhni hokimiyatdan ketishga chaqirmoqda. Namoyishchilar “xalq HAMASning qulashini istaydi”, “Yo‘qolsin HAMAS” deb qichqirgan. HAMASning yuqori martabali amaldori Bassem Naim odamlar norozilik bildirish huquqiga ega ekani, biroq ularning e’tibori “jinoiy tajovuzkor” Isroilga qaratilishi kerakligini aytdi.
Isroil mudofaa vaziri Isroil Kats falastinliklarni namoyishlarga qo‘shilishga chaqirdi.
Siz ham HAMASni G‘azodan olib chiqib ketishni va garovga olingan barcha isroilliklarni zudlik bilan ozod qilishni talab qilishingiz kerak. Bu urushni to‘xtatishning yagona yo‘li, dedi u.
HAMAS tarafdorlari norozilik namoyishchilarini sotqinlikda aybladi.
Falastinliklarni HAMASga qarshi namoyishga chiqishga Isroil undagan(mi?)
Wall Street Journal nashriga ko‘ra, yahudiy davlati namoyishlar fonida G‘azo aholisining telefonlariga “yechim sizning qo‘lingizda va HAMAS sizni do‘zaxga jo‘natishni talab qilmoqda” degan matnli xabarlarni yuborgan.
HAMAS xalqimizdan matonatni saqlab qolishni talab qilmoqda. Ammo o‘layotganimizda va qonga belanganimizda, qanday qilib sabr bardoshli bo‘lishimiz mumkin? HAMAS G‘azoda sodir bo‘layotgan voqealarni to‘xtatishi kerak. Biz butun dunyoga signal beramiz: HAMAS boshqaruvini rad etamiz. G‘azoda hamma HAMASga va urushga qarshi chiqishi kerak, biz bu urushdan to‘yganmiz, degan norozilik namoyishi ishtirokchilaridan biri.
Ba’zi namoyishchilar Al Jazeera axborot tarmog‘ini ochiq tanqid qilib, uning xabarlari HAMAS manfaatlariga xizmat qilishini ta’kidladi. Ularning fikricha, telekanal G‘azodagi falastinliklarning HAMASni tanqid qilayotgan va urushning to‘xtatilishini istayotgan qarashlarini yetarlicha yoritmayapti.
Isroil G‘azo sektoriga hujumlarni qayta tiklagan
Ikki oy davom etgan o‘t ochishni to‘xtatish bo‘yicha kelishuvdan keyin, 18-martga o‘tar kechasi Isroil G‘azoga aviazarbalar berishni tikladi. HAMAS nishonga olinishi aytilgan hujumlarda 400 dan ortiq odam halok bo‘ldi, ularning aksariyati bolalar va ayollar hisoblanadi. Bundan tashqari, 560 dan ortiq kishi jarohatlangan. Hujumni qayta tiklash buyrug‘i Isroil bosh vaziri Binyamin Netanyaxu va mudofaa vaziri Isroil Kats tomonidan berilgan.
Ular o‘t ochishni to‘xtatish rejimini uzaytirish bo‘yicha muzokaralarda oldinga siljish yo‘qligiga javoban shunday qaror qabul qilganini aytgan. Netanyaxu muzokaralarda oldinga siljish yo‘qligi uchun aybni to‘g‘ridan to‘g‘ri HAMASga yuklagan.
Kelishuvning ikkinchi bosqichi Isroildan o‘z kuchlarini G‘azodan olib chiqishni talab qilardi. Hatto 19-yanvarda kuchga kirgan va Isroil qamoqxonalaridagi falastinliklar evaziga garovdagilar ozod etilgan birinchi bosqichda ham Isroil G‘azoda 150 dan ortiq falastinlikni o‘ldirdi.
Isroil bosh vaziri G‘azodagi “barcha kutilmagan qurbonlar” uchun HAMAS javobgar ekanini da’vo qilgan. U G‘azoda yuzlab odam o‘limiga sabab bo‘lgan hujumlar “faqat boshlanishi” ekanini ta’kidlagan. Bundan tashqari Isroil G‘azoda quruqlikdagi operatsiyani qayta boshlagan. Yahudiy davlati G‘azo sektorining shimoliy va janubiy qismlari o‘rtasida bufer zona yaratmoqchi.
Izoh (0)