Isroil armiyasi G‘azodagi janglarda tinch aholidan jonli qalqon sifatida foydalangan. Bu haqda anklavda bo‘lgan isroillik askar CBS News’ga ma’lum qildi. Uning aytishicha, qo‘mondonlar binolarda portlovchi moslamalar bor yoki yo‘qligini aniqlash uchun itlar o‘rniga falastinliklardan foydalanishni buyurgan.
“Ular falastinlik edi. Biz ularni birinchi bo‘lib yubordik, binoda portlovchi tuzoqlar bor-yo‘qligini tekshirish uchun. Ular qo‘rqib, titrab turishardi,” dedi ismi oshkor etilmaslik sharti bilan Tommi taxallusi ostida intervyu bergan askar.
Uning qo‘shimcha qilishicha, mazkur amaliyot armiya uchun “rasmiy siyosat” va “tizimli jarayon” bo‘lgan.
“Biz hech qanday sabab yo‘q bo‘lsa-da, binolarni portlatib yubordik, bu albatta xalqaro qonunlarni buzish. Bundan tashqari, o‘zimizni himoya qilish uchun insonlardan qalqon sifatida foydalandik,” degan u.
Tommining aytishicha, bu usul harbiylar orasida “chivin protokoli” deb nomlanadi. Uning so‘zlarini Isroil armiyasining harakatlarini kuzatib boradigan “Breaking the Silence” nodavlat tashkiloti ham tasdiqlab, mazkur amaliyot G‘azoda keng qo‘llanilayotganini ta’kidlagan.
CBS News izoh so‘rab yahudiy rasmiylariga murojaat qildi. Isroil armiyasi bergan javobda insonlardan jonli qalqon sifatida foydalanish taqiqlangani, ammo Tommining da’volarini tekshirish uchun qo‘shimcha ma’lumot kerakligi ta’kidlanadi.
“Chivin protokoli” G‘azo bilan cheklanmagan
Isroil siyosiy va media doiralari uzoq yillardan beri HAMASni fuqarolardan jonli qalqonlardek foydalanishda ayblab keladi. Biroq CBS News tomonidan o‘tkazilgan surishtiruvga ko‘ra, Isroil kuchlari bu uslubdan nafaqat G‘azo, balki G‘arbiy Sohilda ham foydalanmoqda.
Telekanalning ma’lum qilishicha, Isroil askarlari G‘arbiy Sohilda 14 yoshli Omri Salem va uning 9 yoshli amakivachchasiga qurol bilan tahdid qilib, to‘rt qavatli bino ichini tekshirishga majburlagan.
“Juda qo‘rqdim, keyin ular bizni do‘pposlashni boshlashdi,” deydi Omri.
G‘azoda xizmat qilgan Tommi esa guvoh bo‘lganlari unga qattiq ruhiy zarba bo‘lganini tan oldi.
“Men ma’naviy jarohatlandim, oddiy fuqarolardan itdek inson qalqoni sifatida foydalanish — bu juda jirkanch ish”, dedi u.
Isroil va HAMAS yil boshida erishilgan sulhning keyingi bosqichi bo‘yicha kompromiss topa olmadi. Yahudiy davlati 17-mart kuni muzokaralardan rasman chiqib, G‘oza sektoriga hujumlarni qayta boshladi. Isroil rasmiylari ularning jangovar amaliyotlari faqat HAMAS a’zolariga qarshi qaratilganini iddao qilsa-da, tinch aholidan qurbonlar soni misli ko‘rilmagan darajaga yetdi. G‘azo sog‘liqni saqlash idoralariga ko‘ra, 2023-yil 7-oktyabrdan buyon 50 mingdan ortiq falastinlik halok bo‘lgan.
Izoh (0)