Arab davlatlari tashqi ishlar vazirlari AQSH prezidenti Donald Trampning Misr va Iordaniyaga G‘azo sektori aholisini ko‘chirish haqidagi chaqirig‘iga qarshi yagona pozitsiyani bildirgan holda, falastinliklarni har qanday vaziyatda ham o‘z yerlaridan ko‘chirishni qat’iyan rad etishdi.

Qohiradagi uchrashuvdan so‘ng Misr, Iordaniya, Saudiya Arabistoni, Qatar, Birlashgan Arab Amirliklari, Falastin va Arab davlatlari ligasi TIV rahbarlari hamda rasmiy vakillari qo‘shma bayonotda bunday qadam mintaqadagi barqarorlikka tahdid solishi, mojaroni kengaytirishi va tinchlik istiqbollariga putur yetkazishini ta’kidlashdi.

Biz falastinliklarning ajralmas huquqlariga, xoh ko‘chmanchilik faoliyati, aholi ko‘chirish yoki yerlarni qo‘shib olish orqali bo‘lsin, xoh yerlarni egalaridan tortib olish orqali bo‘lsin, har qanday shaklda yoki har qanday vaziyatda yoxud bahona bilan xavf solishga har qanday urinishlarni qabul qilmasligimizni tasdiqlayamiz, deyiladi qo‘shma bayonotda.

Ular ikki davlat to‘g‘risidagi qaror asosida Yaqin Sharqda adolatli va keng qamrovli tinchlikka erishish uchun Tramp ma’muriyati bilan hamkorlik qilishga umid bildirdilar.

Uchrashuv o‘tgan hafta Tramp G‘azoni 15 oylik Isroil bombardimonlaridan so‘ng “vayron bo‘lgan joy” deb atab, Misr va Iordaniya u yerdagi falastinliklarni qabul qilishi kerakligini aytganidan keyin bo‘lib o‘tdi. Bu bombardimonlar tufayli 2,3 million aholining aksariyati boshpanasiz qolgan edi. Tanqidchilar Trampning taklifini etnik tozalashga tenglashtirishdi.

Misr prezidenti Abdulfattoh as-Sisi Misr G‘azo aholisining ko‘chirilishiga yordam berishi haqidagi g‘oyani rad etdi.

Shundan so‘ng Tramp bu g‘oyani yana takrorlab, “Misr va Iordaniya buni amalga oshirmoqchi” ekanini aytdi.

U, shubhasiz, AQShning Misr va Iordaniyaga ko‘rsatayotgan katta yordamini, jumladan harbiy yordamni nazarda tutgan, deb yozadi Al Arabiya.

Iordaniyada allaqachon bir necha million falastinlik yashaydi, o‘n minglab falastinliklar esa Misrda istiqomat qiladi.

Arab vazirlari, shuningdek, Misrning BMT bilan hamkorlikda G‘azo hududini qayta tiklashga bag‘ishlangan xalqaro konferensiya o‘tkazish rejalarini ma’qulladilar. Konferensiyaning aniq sanasi hozircha belgilanmagan.

Tramp G‘azoni “tozalash” uchun falastinliklarni arab davlatlariga ko‘chirishga chaqirdi

AQSH prezidenti avvalroq Iordaniya, Misr va boshqa arab davlatlarini G‘azodan qabul qilayotgan falastinlik qochqinlar sonini ko‘paytirishga chaqirgan edi. Tramp fikricha, urushdan xarob bo‘lgan hududni “tozalash” uchun aholining yetarli qismini ko‘chirish kerak. U buni Iordaniya qiroli Abdulla II bilan telefon orqali muloqotda muhokama qilganini aytgan.

Men u odamlarni qabul qilishini xohlardim. Misr ularni qabul qilishini istardim. Ehtimol, 1,5 million kishi haqida gap ketyapti. Biz shunchaki tartib o‘rnatib, hammasi ortda qoldi, deymiz, dedi u.

Shu bilan birga, u Iordaniya qirolini ko‘plab falastinlik qochqinlarni qabul qilgani uchun maqtadi.

Biror narsa bo‘lishi kerak. Ammo hozir bu tom ma’noda vayronalar makoni. Deyarli hamma narsa vayron qilingan, odamlar o‘lib ketyapti, deya Tramp G‘azo sektoridagi hozirgi vaziyatni nazarda tutdi.

U bu vaziyatda falastinlik qochqinlarga G‘azo tashqarisida uy-joy qurish uchun ba’zi arab davlatlari bilan hamkorlikni afzal ko‘rishini aytdi.