Isroil HAMAS bilan G‘azo sektorida o‘t ochishni to‘xtatish bo‘yicha kelishuv doirasida 90 nafar falastinlik mahbusni qamoqdan ozod qildi. Bu haqda Associated Press xabar berdi.
Iordan daryosining g‘arbiy sohilida joylashgan Ofer harbiy qamoqxonasi hududidan oynalari qoraytirilgan ikkita avtobus chiqib ketgan. Gap Iordan daryosining g‘arbiy sohilida yashovchi 78 nafar va Sharqiy Quddusda yashovchi 12 nafar falastinlikning ozod qilingani haqida ketmoqda.
Ular orasida 70 nafar ayol, shu jumladan, bir nafar voyaga yetmagan qiz, 8 nafar voyaga yetmagan o‘g‘il bola va nisbatan kichik huquqbuzarliklar uchun sudlangan 12 nafar erkak bor.
HAMAS Isroilga uch nafar garovdagi ayolni qaytardi
Bundan bir necha soat oldin Falastin harakati isroillik uch nafar garovga olingan ayolni ozod qildi: 24 yoshli Romi Gonen, 28 yoshli Emili Damari va 31 yoshli Doron Shtaynbrexer. Ular urushayotgan tomonlar o‘rtasidagi bitimning birinchi bosqichini bajarish doirasida Xalqaro Qizil Xoch Qo‘mitasiga topshirilgandi.
Isroil armiyasi ma’lumotlariga ko‘ra, ular harbiy xizmatchilar va xavfsizlik kuchlari xodimlari hamrohligida Isroilga olib ketilgan, ularning ahvolini baholash uchun tibbiy ko‘rikdan o‘tish kutilmoqda.
236 nafar falastinlik mahbus darhol uchinchi mamlakatlarga ketadi
Isroil va HAMAS o‘rtasidagi kelishuv shartlariga ko‘ra, birinchi bosqichda 737 nafar falastinlik mahbus ozod qilinadi. Ularning 296 nafari umrbod qamoq jazosiga hukm qilingan. Shu bilan birga, 236 nafar falastinlik ozodlikka chiqqach, darhol uchinchi mamlakatlarga — “asosan Qatar yoki Turkiyaga” jo‘natiladi.
Izoh (0)