AQSH prezidenti Donald Tramp mamlakat G‘azo sektorini o‘z nazoratiga olishini aytdi. U bu haqda 4-fevral kuni Oq uyda Isroil bosh vaziri Binyamin Netanyaxu bilan uchrashuvda ma’lum qildi.
Tramp G‘azo sektori haqida: “Biz unga egalik qilamiz”
“AQSH G‘azo sektorini nazoratga oladi, biz u bilan ishlaymiz, unga egalik qilamiz va u yerdagi portlamagan barcha xavfli bombalar va boshqa qurollarni joyida demontaj qilish uchun javobgar bo‘lamiz. Agar zarur bo‘lsa, buni amalga oshiramiz, bu hududni nazoratga olamiz, uni rivojlantiramiz, minglab ish o‘rinlari yaratamiz. Bu butun Yaqin Sharq faxrlanadigan narsaga aylanadi”, dedi Tramp.
U yerda kimlar yashashi haqidagi savolga AQSH prezidenti G‘azo sektori “dunyo aholisi” va “Yaqin Sharq daryosi”ga aylanishi mumkinligini aytdi.
“Men haqiqatan ham uzoq muddatli boshqaruvni ko‘ryapman va bu Yaqin Sharqning ushbu qismiga katta barqarorlik olib kelishini tasavvur qilyapman. Men buni oylar davomida juda sinchkovlik bilan o‘rganib chiqdim”, deb davom etdi Tramp.
Bu AQSH qo‘shinlarini G‘azo sektoriga yuborishni anglatadimi, degan savolga “Biz zarur bo‘lgan ishni bajaramiz”, deya javob berdi u.
“Men Isroilni yaxshi ko‘raman. Men u yerga boraman, G‘azoni ziyorat qilaman, Saudiya Arabistoni va Yaqin Sharqning boshqa joylariga tashrif buyuraman”, deb va’da berdi Oq uy rahbari.
Netanyaxu bu so‘zlarni ijobiy qabul qildi. Isroil bosh vaziriga ko‘ra, Tramp “g‘ayriodatiy, yangi g‘oyalar bilan fikrlaydi” va “an’anaviy tafakkurni buzishga tayyorligini namoyish etadi”.
Arab mamlakatlari Tramp rejasiga qarshi
Yanvar oyi oxirida Tramp arab davlatlarini G‘azo sektoridan ko‘proq qochqinlarni qabul qilishga chaqirib, falastinlik arablar uchun sektor tashqarisida, “ular tinch yashashi mumkin bo‘lgan joyda” uy-joy qurishlari kerakligini aytgandi.
1-fevral kuni Qohirada bo‘lib o‘tgan uchrashuvda Misr, Iordaniya, BAA, Saudiya Arabistoni va Qatar tashqi ishlar vazirlari Trampning G‘azo sektori aholisini boshqa arab davlatlariga olib chiqish haqidagi taklifini rad etdi. TIV rahbarlari qo‘shma bayonotida “falastinliklarni ko‘chirish, ko‘chirishni rag‘batlantirish yoki o‘z yerlaridan chiqarib yuborishga” qarshi chiqqan.
Izoh (0)