Falastinning HAMAS harakati vositachilar bilan muzokaralar ijobiy ruhda o‘tganini e’lon qildi va shu munosabat bilan G‘azo sektorida o‘t ochishni to‘xtatish, jumladan, belgilangan muddatda garovga olinganlarni falastinlik mahbuslarga almashish bo‘yicha kelishuvga rioya qilishini tasdiqladi.
G‘azodagi HAMAS yetakchisi Xalil al-Hayya boshchiligidagi muzokara delegatsiyasi Qohirada Misr umumiy razvedka boshqarmasi boshlig‘i Hasan Rashad bilan muzokaralar o‘tkazdi. Shuningdek, Qatar bosh vaziri va tashqi ishlar vaziri Muhammad Abdul Rahmon al-Tani bilan telefon orqali muloqot bo‘ldi. Maslahatlashuvlar ijobiy ruhda o‘tdi va HAMAS kelishuv shartlarini, jumladan, belgilangan muddatlarda asirlarni garovga olinganlarni mahbuslarga almashish jarayonini amalga oshirishni davom ettirishini tasdiqlaydi, deyiladi hujjatda.
Harakatning ta’kidlashicha, uning vakillari vositachilar bilan muzokaralar chog‘ida “bitimning barcha shartlarini bajarish zarurligiga”, xususan, G‘azoga katta hajmdagi gumanitar yordam yetkazilishi kerakligiga e’tibor qaratgan. HAMAS anklavga G‘azo aholisini vaqtincha joylashtirish uchun chodirlar, shuningdek, vayronalarni tozalash uchun og‘ir texnika, yoqilg‘i va dori-darmonlar olib kirilishi zarurligini qayd etgan. Harakat vakillariga ko‘ra, vositachilar ularni “bu talablarning barchasi bajarilishini kuzatib borishga” ishontirgan.
HAMAS bayonoti e’lon qilinganidan ko‘p o‘tmay, Misrning “Al-Qohira al-Ixbariya” telekanali Qohira va Doha G‘azo sektorida o‘t ochishni to‘xtatish bo‘yicha kelishuvni amalga oshirish yo‘lidagi to‘siqlarni bartaraf eta olgani haqida bayonot berdi. Kanal manbasiga ko‘ra, “har ikki tomon — Isroil va HAMAS yarashuv bitimi shartlariga amal qiladi”.
HAMAS nega garovga olinganlarni berishni to‘xtatdi?
Falastin harakati Isroilni o‘t ochishni to‘xtatish to‘g‘risidagi kelishuvni buzganlikda, jumladan, G‘azodagi falastinliklarga havo hujumlari uyushtirganlikda ayblab, garovga olinganlarni ozod qilish kelasi shanba kuniga qoldirilishini aytgan.
So‘nggi uch hafta davomida biz dushman tomonidan kelishuv shartlarining doimiy ravishda buzilishini kuzatdik, dedi HAMASning harbiy qanoti hisoblanmish “Izzaddin al-Qassam brigadalari” guruhi vakili Abu Ubayda.
HAMAS shu munosabat bilan 15-fevral kuni ozod qilinishi kutilayotgan asirlarni Isroilga qaytarishni keyingi ogohlantirishgacha kechiktirishga qaror qilgan. U Isroil kelishuv qoidalariga rioya qilishi va so‘nggi haftalarda yetkazilgan zararni qoplashi kerakligini ta’kidlagan. Keyingi almashinuv shanba kuniga belgilangan bo‘lib, unda yuzlab falastinlik mahbuslar evaziga uch nafar isroillik garovga olinganlarni ozod qilish rejalashtirilgandi.
Isroilni kelishuvni muntazam ravishda buzishda ayblagan Abu Ubaydaning ta’kidlashicha, ayblovlar “ko‘chirilgan falastinliklarga G‘azo shimoliga qaytishga ruxsat berishni kechiktirish, havo hujumlari va sektorning turli hududlarini o‘qqa tutish, shuningdek, kelishuvlarga muvofiq gumanitar yordam yetkazib berishga ko‘maklashishga qodir emaslikni o‘z ichiga oladi”.
Izoh (0)