AQSH prezidenti Donald Tramp HAMASga G‘azoda garovga olinganlarni ozod qilish bo‘yicha yangi talab qo‘ydi. Bu haqda BBC xabar berdi.
Isroil ma’lumotlariga ko‘ra, G‘azoda hali ham 59 kishi garovda ushlab turilmoqda, ularning 24 nafari tirik bo‘lishi mumkin. Asirlar orasida AQSH fuqarolari ham bor.
Bu AQSH HAMAS bilan to‘g‘ridan to‘g‘ri muzokaralar boshlaganini tasdiqlaganidan bir necha soat o‘tib, e’lon qilindi. Bu muzokaralar amerikalik garovga olinganlarni ozod qilishda Isroilni chetlab o‘tishi mumkin. Vashington shu paytgacha HAMAS bilan bevosita aloqa qilishdan qochib kelgan.
Tramp garovga olinganlar ozod etilmasa, bu HAMASga qimmatga tushishini aytgan. Isroilga esa qanday yordam ko‘rsatayotganini haqida izoh keltirmagan.
Tanlov sizning qo‘lingizda. Barcha garovdagilarni hoziroq, kechiktirmasdan ozod qiling va o‘ldirilgan odamlarning jasadlarini darhol qaytarib bering, aks holda sizga juda yomon bo‘ladi. Men Isroilga ishni yakunlash uchun kerak bo‘lgan hamma narsani yubormoqdaman.
Agar aytganimni qilmasangiz, HAMASning birorta a’zosi ham omon qolmaydi. Men hozirgina siz hayotini izdan chiqargan sobiq garovdagilar bilan uchrashib keldim. Bu sizga oxirgi ogohlantirish! Rahbariyat uchun endi G‘azoni tark etish vaqti keldi, hali imkoniyatingiz bor. G‘azo xalqiga esa: sizni ajoyib kelajak kutmoqda, lekin garovdagilarni ushlab tursangiz, bu sizga nasib etmaydi, deya tahdid qildi Tramp.
Bu Trampning HAMASga ilk tahdidi emas. U prezident bo‘lganidan buyon garovga olinganlarni ozod qilishni ta’kidlab keladi. Oq uy matbuot kotibi Karolin Levitt ham Trampning HAMAS bilan garovga olinganlarning ozod etilishini ta’minlash bo‘yicha muzokaralar olib borganini tasdiqlagan.
Prezident Tramp Amerika xalqi manfaatlarini ko‘zlab ish yuritishni xohlaydi. Garovga olinganlar bo‘yicha maxsus vakil Adam Boehlerning faoliyati ham Amerika xalqi uchun, dedi Levitt.
Axios bergan ma’lumotlarga ko‘ra, tomonlar Qatarda garovga olingan AQSH fuqarolarini ozod qilish masalasida muzokaralar olib borishmoqda. Bu xabarni Oq uy matbuot kotibi ham tasdiqlagan.
AQSH Mudofaa vazirining Yaqin Sharq bo‘yicha sobiq o‘rinbosari AQSH o‘z fuqarolarini qaytarishda “faolroq bo‘lishi” kerakligini aytgan. Adam Boehler so‘nggi haftalarda Qatar poytaxti Dohada HAMAS vakillari bilan uchrashgan. HAMASning Dohada 2012-yildan buyon qarorgohi mavjud bo‘lib, u Obama ma’muriyati iltimosiga ko‘ra tashkil etilgan.
Izoh (0)