Икки гумонланувчи Исроил бош вазири Бинямин Нетaняҳу идорасининг Қатар вакиллари билан алоқаси борлиги ҳақидаги “Қатаргейт” иши доирасида сўроқ қилиш учун ҳибсга олинган. Бу ҳақда Полиция матбуот хизмати душанба куни шундай маълумот берганини КАН агентлиги хабар қилди.

Баёнотда ҳибсга олинганларнинг исмлари кўрсатилмаган, бироқ Исроил телевидениесининг 12-канали маълум қилишича, ҳуқуқ-тартибот органлари Нетaняҳунинг катта маслаҳатчиси Ёнатан Урих ва Нетaняҳунинг собиқ матбуот котиби Эли Фелдштейнни ушлаган.
Телеканалнинг таъкидлашича, ҳибсга олинганлар полицияга пулни ким берганини ва ҳақиқатан ҳам Қатар учун ишлаганини ёки ишламаганини айтиб беришлари керак бўлади.
Терговни “Лахав 433” жиноятчиликка қарши курашиш бўйича миллий полиция бўлинмаси ва Умумий хавфсизлик хизмати (ШАБАК) олиб бормоқда.
Илгари ШАБАК Исроил бош вазири идораси ходимлари ва Қатар амалдорлари ўртасидаги эҳтимолий алоқаларни текшириш билан шуғулланган эди.
Times of Israel нашрининг ёзишича, Исроил бош прокурори Гали Баҳарав-Миара аввалроқ Исроил мудофаа кучларининг (СAHAЛ) махфий ҳужжатларини ошкор қилишда айбланган Нетaняҳунинг собиқ матбуот котиби Эли Фелдштейн Доҳа ёллаган халқаро фирма орқали араб давлати учун ишлагани ва исроиллик журналистларни Қатар тарафдори материаллар билан таъминлагани маълум бўлгач, ушбу текширувни ўтказишни буюрган.
Ўтган йилнинг ноябрь ойида Нетaняҳунинг ёрдамчилари Урих ва Исроил Айнхорн 2022 йилги жаҳон чемпионати арафасида Қатарда жамоатчилик билан алоқаларни йўлга қўйгани ҳақида ҳам хабар берилган эди.
Исроилда бош вазир Бинямин Нетaняҳу идораси ва Қатар вакиллари ўртасидаги алоқадорлик бўйича тергов тафсилотларини ошкор қилишга суд томонидан тақиқ қўйилган.
Изоҳ (0)