Isroil 2023-yil oktyabr oyida G‘azoga hujumlar boshlaganidan beri halok bo‘lgan falastinliklar soni 50 mingdan oshdi. Bu haqda Al Jazeera xabar berdi.
G‘azo Sog‘liqni saqlash vazirligiga ko‘ra, 7-oktyabrdan buyon kamida 50 021 falastinlik halok bo‘lgan. Yaradorlar soni 113 274 kishini tashkil etmoqda. Isroil harbiylari 23-mart kuni kechqurun Xon Yunusdagi Nosir tibbiyot majmuasidagi jarrohlik binosiga zarba bergan. Hujum tufayli boshlangan yirik yong‘in sabab qurbonlar soni ortishi mumkin.
Isroil armiyasi va razvedka agentligi o‘z bayonotida hujumni tasdiqlagan. Ular odatdagiday shifoxonada HAMASning “asosiy” a’zosini nishonga olganini da’vo qilgan.
Aytib o‘tish joizki, 50 ming — faqat taxminiy ko‘rsatkich. Bu faqat G‘azo hududidagi tibbiy muassasalarda ro‘yxatga olingan odamlar soni. Ro‘yxatga olinmay dafn etilgan yoki bedarak yo‘qolgan, vayronalar ostida qolib ketgan yana qanchadan qancha odamlar bor.
Halok bo‘lganlarning 17 ming nafari bolalardir. Butun bir avlod yo‘q qilib yuborildi. Bu bolalar o‘z jamiyatlarining siyosiy, iqtisodiy va intellektual jihatdan rivojlanishiga ta’sir ko‘rsatgan bo‘lardi, dedi Al Jazeera muxbiri Hani Mahmud.
G‘azo media idorasiga ko‘ra, tasdiqlangan qurbonlar soni bedarak yo‘qolgan va vafot etgan deb taxmin qilinayotgan 11 mingdan ortiq kishini o‘z ichiga olmaydi. 2024-yil iyul oyida Lancet jurnalida chop etilgan tadqiqotda Isroil hujumlari tufayli qurbonlar soni 186 mingdan ortishi mumkinligi prognoz qilingan.
Isroil o‘zining hujumlari HAMAS a’zolariga ehtiyotkorlik bilan qaratilganini bir necha bor ta’kidlagan, ammo halok bo‘lgan tinch aholi soni boshqa narsani ko‘rsatadi, deydi tahlilchilar.
Isroil G‘azo sektoriga hujumlarni qayta tiklagan
Ikki oy davom etgan o‘t ochishni to‘xtatish bo‘yicha kelishuvdan keyin18-martga o‘tar kechasi Isroil G‘azoga aviazarbalar berishni tikladi. HAMAS nishonga olinishi aytilgan hujumlarda 400 dan ortiq odam halok bo‘ldi, ularning aksariyati bolalar va ayollar hisoblanadi. Bundan tashqari, 560 dan ortiq kishi jarohatlangan. Hujumni qayta tiklash buyrug‘i Isroil bosh vaziri Binyamin Netanyaxu va mudofaa vaziri Isroil Kats tomonidan berilgan.
Ular o‘t ochishni to‘xtatish rejimini uzaytirish bo‘yicha muzokaralarda oldinga siljish yo‘qligiga javoban shunday qaror qabul qilganini aytgan. Netanyaxu muzokaralarda oldinga siljish yo‘qligi uchun aybni to‘g‘ridan to‘g‘ri HAMASga yuklagan.
Kelishuvning ikkinchi bosqichi Isroildan o‘z kuchlarini G‘azodan olib chiqishni talab qilardi. Hatto 19-yanvarda kuchga kirgan va Isroil qamoqxonalaridagi falastinliklar evaziga garovdagilar ozod etilgan birinchi bosqichda ham Isroil G‘azoda 150 dan ortiq falastinlikni o‘ldirdi.
Isroil bosh vaziri G‘azodagi “barcha kutilmagan qurbonlar” uchun HAMAS javobgar ekanini da’vo qilgan. U G‘azoda yuzlab odam o‘limiga sabab bo‘lgan hujumlar “faqat boshlanishi” ekanini ta’kidlagan.
Izoh (0)