Qatar Yevroparlamentdan chetlatilishi qanday oqibatlarga olib kelishi haqida ogohlantirdi

Qatar Yevropa parlamentidagi korrupsiya mojarosi ayblovlarini rad etdi va qatarlik mansabdorlar Yevroparlament kiritilmay qo‘ygan taqdirda, gaz yetkazib berish bo‘yicha salbiy oqibatlar haqida ogohlantirdi. Bu haqda Dohaning bayonotiga tayanib, AFP xabar berdi.

Bayonotda aytilishicha, sud jarayoni tugaguniga qadar Qatarning Yevropa parlamentidan chetlashtirilishi “diskriminatsion” chora va u “xavfsizlik sohasidagi mintaqaviy va global hamkorlikka hamda global energiya tanqisligi va xavfsizlik bo‘yicha joriy muzokaralarga salbiy ta’sir qiladi”. “Hukumatimizning qonun buzilishlariga aloqadorligi haqidagi ayblovlarni qat’iyan rad etamiz”, — deyiladi xabarda.

Yevroparlamentdagi korrupsiya mojarosi

Dekabr boshida Yevroparlament raisi o‘rinbosari, Gretsiyadan sotsial-demokratik qanot vakili Yeva Kayli futbol bo‘yicha jahon chemionatiga mezbonlik qilgan Qatar tomonidan ehtimoliy korrupsiya yuzasidan tekshiruv doirasida olti nafar gumonlanuvchidan biriga aylandi. Bunga Belgiya prokuraturasining Qatar “katta pul mablag‘i va sovg‘alar yordamida Yevroparlament qarorlariga ta’sir qilishga intilgani” haqidagi gumonlari asos bo‘ldi.

11-dekabr kuni Belgiya hukumati to‘rt nafar gumonlanuvchiga nisbatan ayblovlar e’lon qildi va ularni hibsga olish uchun order berdi. “Ular jinoiy uyushishda, pul yuvishda va korrupsiyada ayblanmoqda”, — dedi prokuratura. Kaylining o‘zi barcha ayblovlarni inkor qildi.

Yevroparlament deputatlarining aksariyati 15-dekabr kuni tekshiruv vaqtida qatarlik mansabdorlarni Yevroparlamentdan chetlatishni yoqlab ovoz berdi. Yakuniy qaror parlament spikeri Roberta Metsola tomonidan berilishi kerak. Uning so‘zlariga ko‘ra, bunday lobbizmga qarshi qaratilgan islohotlar paketi kelasi yil taqdim etiladi.