AQSH prezidenti Donald Tramp mamlakatdagi sud tizimini tekshirish zarurligini ta’kidlab, Amerika poytaxti Vashington va Nyu Yorkdagi sudlarni eng korrupsiyalashgan va radikal sudlar deb baholadi.
“Mamlakatimizning ko‘plab hududlarida sud tizimi ishdan chiqqan, Nyu York va Vashington esa korrupsiya va radikalizm bo‘yicha peshqadamlik qilmoqda. Kech bo‘lmasidan oldin ushbu soxtalashtirilgan tizimni zudlik bilan tekshirish lozim!”, deya Tramp o‘zining Truth Social ijtimoiy tarmog‘idagi sahifasida yozgan.
Amerika rahbari, xususan, muhojirlarni AQSHdan ommaviy deportatsiya qilishni to‘xtatish va ular bilan barcha reyslarni qaytarishni buyurgan sudya Jeyms Boasbergni “o‘ta adolatsiz” deb baholagan.
“Sudya Jeyms Boasbergning men bilan bog‘liq to‘rtinchi ishni qo‘lga kiritgani qanday sharmandalik! Bu statistik jihatdan imkonsiz”, deya ta’kidladi Tramp.
“Kolumbiya poytaxti okrugining bosh sudyasi bo‘lgan Boasberg, garchi bunday bo‘lmasligi kerak bo‘lsa-da, “Trampning barcha ishlarini” go‘yo o‘ziga olib qo‘yayotganga o‘xshaydi. Sudyalar o‘rtasida ishlarni tasodifiy taqsimlash tizimi hali ham mavjudmi? Ehtimol, buning endi ahamiyati yo‘q, chunki men uchun Vashingtonda adolatli sud qarorini olish deyarli imkonsiz”, deydi Amerika rahbari.
Izoh (0)