Tramp AQSH importiga yangi bojlarni eʼlon qilishga tayyorlanmoqda. Bu safar farmatsevtika mahsulotlari importiga bojlar joriy qilish rejalashtirilgan.
Bu haqda AQSH prezidenti Donald Tramp prezident samolyoti bortidagi matbuot anjumanida ma’lum qilgan.
Uning aytishicha, yaqin orada yangi bojlar haqida rasman e’lon qilinadi. Tramp ushbu chora dori va farmatsevtika mahsulotlari ishlab chiqarishni AQSHga qaytarishga qaratilganini ta’kidladi.
“Bu choralar farmatsevtika kompaniyalari, dori ishlab chiqaruvchilar ishlab chiqarishni mamlakatimizga ko‘chirishlari uchun yetarli bo‘ladi. Men COVID-19 davrida bo‘lgani kabi, bu borada boshqa mamlakatlarga tayanishni xohlamayman”, dedi Tramp.
Shu bilan birga, Amerika prezidenti qo‘shimcha qilganidek, u farmatsevtika mahsulotlarini ishlab chiqaradigan boshqa davlatlar bilan, masalan, Britaniya bilan tariflar bo‘yicha bitimlar tuzishga tayyor, ammo bu kelishuvlar AQSHga foyda keltirishi kerak.
Avvalroq Xalqaro valyuta jamg‘armasi (XVJ) AQSH prezidenti Donald Tramp ma’muriyati tomonidan joriy etilayotgan bojxona to‘lovlarining xorijiy mahsulotlarga ta’sirini baholayotgani haqida xabar berilgandi.
Jamg‘arma rasmiy vakili Juli Kozak ta’kidlashicha, Kanada va Meksika tovarlariga qo‘yilgan Amerika bojlari boshqa mintaqalar va mamlakatlar guruhlariga sezilarli salbiy ta’sir ko‘rsatishi mumkin.
Izoh (0)