АҚШ президенти Дональд Трамп агар россиялик ҳамкасби Владимир Путин урушни тўхтатишга рози бўлмаса, Россия нефтига 25 фоизлик иккиламчи бож жорий этишидан огоҳлантирди. Бу ҳақда сиёсатчи NBC News’га берган интервьюсида маълум қилди.
Унинг сўзларига кўра, 25 фоиз миқдоридаги божлар исталган вақтда жорий этилиши мумкин ва агар келишув тузилмаса, бир ой ичида кучга киради.
Агар Россия билан Украинадаги қон тўкилишини тўхтатиш бўйича келишувга эриша олмасам ва бунинг сабабчиси Россия деб ҳисобласам (гарчи бундай бўлмаслиги ҳам мумкин), лекин агар мен буни Россиянинг айби деб ўйласам, Россиядан чиқадиган барча нефтга иккиламчи божлар жорий қиламан. Бу шуни англатадики, агар сиз Россиядан нефть сотиб олсангиз, АҚШда бизнес юрита олмайсиз.
Ўт очишни тўхтатиш тўғрисида келишув бўлмаса, бир ой ичида божларни жорий этаман. Путин ғазабланганимни билади, лекин биз у билан “жуда яхши муносабатдамиз” ва агар Путин тўғри иш қилса, ғазабим тезда тарқалади, дея таъкидлади Трамп.
Шунингдек, АҚШ раҳбари келгуси ҳафта Путин билан мулоқот қилишни режалаштираётганини қайд этди. Трамп сайловолди кампаниясида президентликка киришгач Украинадаги урушни 24 соат ичида тугатишга ваъда берганди. Иккинчи президентлик муддатининг дастлабки бир неча ойида АҚШ, Украина ва Россия расмийлари ўртасида учрашувлар бўлиб ўтди.
Ўтган ҳафта Россия ва Украина Қора денгизда хавфсиз ҳаракатланиш ва бир-бирининг энергетика объектларига ҳужумларни тўхтатиш имконини берувчи қисман ва чекланган ўт очишни тўхтатиш тўғрисида келишиб олди.
Изоҳ (0)