Ukraina prezidenti Vladimir Zelenskiy 19-mart kuni AQSH rahbari Donald Tramp bilan o‘tkazilgan telefon suhbati haqida X ijtimoiy tarmog‘ida yozib, “Bu yil mustahkam tinchlikka erishish mumkinligi”ga ishonch bildirdi.
Uning aytishicha, Ukraina va AQSH jamoalari “tinchlikka erishish yo‘lidagi qadamlarni muvofiqlashtirish”ni davom ettirish uchun yaqin kunlarda Saudiya Arabistonida uchrashishga tayyor.
“Men AQSH prezidenti Donald Tramp bilan ijobiy, juda mazmunli va samimiy suhbat o‘tkazdim. Unga 11-mart kuni Jiddada Ukraina va Amerika jamoalari ishini yaxshi va samarali boshlagani uchun minnatdorlik bildirdim. Bu jamoalar uchrashuvi urushni to‘xtatish yo‘lida sezilarli yordam berdi. Biz Ukraina va AQSH urushni haqiqatan ham to‘xtatish va mustahkam tinchlikka erishish uchun hamkorlikda ishlashni davom ettirishi kerakligi haqida kelishib oldik. Amerika bilan birgalikda, prezident Tramp va Amerika rahbarligida bu yil mustahkam tinchlikka erishish mumkin, deb o‘ylaymiz”, deya yozadi Zelenskiy.
Zelenskiyning aytishicha, Tramp u bilan Putin bilan suhbati tafsilotlari va muhokama qilingan asosiy masalalar haqida fikr almashgan:
“Urushni butunlay to‘xtatish yo‘lidagi dastlabki qadamlardan biri energetika va boshqa fuqarolik infratuzilmasiga zarba berishni to‘xtatish bo‘lishi mumkin. Men bu qadamni qo‘llab-quvvatladim va Ukraina uni amalga oshirishga tayyorligini tasdiqladim. Jamoalarimiz bu qadamni Jiddada muhokama qilishdi. Amerika tomoni ham front chizig‘ida hech qanday shartlarsiz o‘t ochishni to‘xtatishni taklif qildi va Ukraina ham bu taklifni qabul qildi. Biz buning amalga oshishi uchun ishlashda davom etamiz. Bunday qadamlar o‘t ochishni to‘xtatish davrida keng qamrovli tinchlik bitimini tayyorlash uchun imkoniyat yaratish uchun zarur, deb hisoblaymiz”, deydi Ukraina prezidenti.
19-mart kuni Ukraina prezidenti Vladimir Zelenskiy va AQSH prezidenti Donald Tramp o‘rtasida telefon orqali suhbat bo‘lib o‘tgani, Amerika yetakchisi bir soatdan ortiq vaqt davom etgan muloqot juda yaxshi kechgani haqida yozib qoldirgani xabar berilgandi.
Izoh (0)