Xalqaro valyuta jamg‘armasi (XVJ) AQSH prezidenti Donald Tramp ma’muriyati tomonidan joriy etilayotgan bojxona to‘lovlarining xorijiy mahsulotlarga ta’sirini baholamoqda. Bu haqda jamg‘arma rasmiy vakili Juli Kozak jurnalistlar uchun o‘tkazilgan brifingda ma’lum qilgan.
“Bugungi kunda aytishim mumkinki, so‘nggi bir necha hafta ichida biz savdo sohasida bir qancha yangi o‘zgarishlarni kuzatdik. Albatta, kecha avtomobilsozlik sohasiga tariflar bo‘yicha bayonot berildi va AQSH ma’muriyati ham kelasi hafta, 2-aprelda bojlar bo‘yicha yangi bayonotlar berilishini ma’lum qildi. Biz ushbu bayonotlarning ta’sirini baholash jarayonidamiz va bu ishni jahon iqtisodiyotining rivojlanish istiqbollari sharhini tayyorlash doirasida davom ettiramiz. Bu sharh, aytganimdek, aprel oyida e’lon qilinadi”, dedi u.
Kozak ta’kidlaganidek, Kanada va Meksika tovarlariga qo‘yilgan Amerika bojlari, Meksika va Kanadaga, shuningdek, boshqa mintaqalar va mamlakatlar guruhlariga sezilarli salbiy ta’sir ko‘rsatishi mumkin.
“Biz hozirda ushbu tahlilni o‘tkazmoqdamiz. Bu jarayon davomida barcha e’lonlar, iqtisodiy o‘zgarishlar va ma’lumotlarni ko‘rib chiqamiz”, deya ta’kidladi u.
XVJ rasmiy vakili qo‘shimcha qilishicha, jamg‘arma “ma’lum bir vaqtda Amerika bojlari bo‘yicha yangi ma’lumotlarni hisobga olmaydigan sanani belgilaydi” va mavjud ma’lumotlarni tahlil qilishga e’tibor qaratadi.
26-mart kuni Tramp AQSH hududidan tashqarida ishlab chiqarilgan barcha avtomobillar uchun import bojlarini 25 foiz miqdorida joriy etishini ma’lum qildi. Ilgari amal qilgan 2,5% miqdoridagi bojlar ham saqlanib qolishi kerak, natijada yangi tarif stavkasi 27,5% ni tashkil etadi.
Politico gazetasining baholashicha, Tramp e’lon qilgan avtomobillar importiga bojlar Yevropa avtomobil sanoatini halokat yoqasiga keltirishi mumkin. Ular allaqachon past sotuvlar va arzonroq Xitoy avtomobillari bilan raqobat fonida inqirozga yuz tutayotgan Yevropa Ittifoqi avtomobil sanoatiga jiddiy zarba berishi mumkin.
Izoh (0)